Aqtóbede bankter klıentterden nesıe komıssııasyna ustaǵan aqshasyn qaıtaryp jatyr

AQTÓBE. QazAqparat - Ulttyq banktiń Aqtóbe oblystyq fılıal qyzmetkerleri sot otyrystaryna jıi qatysyp júr. Bıyl 70 nesıe alýshy banktiń komıssııa úshin alǵan shyǵynyn keri qaıtartyp alǵan, dep habarlaıdy QazAqparat tilshisi.

Sońǵy ýaqytta qazaqstandyqtar ekinshi deńgeıli bankterden alǵan nesıeniń kelisimshartyn qaıta teksertip jatyr. Áleýmettik jeli arqyly tarap ketken habarlamadan soń sotqa aryz jazatyndardyń sany arta túsken. «Aqtóbe aqparat» ortalyǵynda baspasóz máslıhatyn ótkizgen Ulttyq banktiń Aqtóbe oblystyq fılıaly bank komıssııasynyń shyǵynyn keri qaıtaryp alǵan klıentterdiń óskenin málimdedi. Úsh jyl buryn alynǵan jáne qazirgi nesıeniń komıssııa shyǵynyn keri qaıtarýǵa bolady. Aldymen klıent sotqa aryz túsirip, talaptaryn qoıýy kerek.

«Bank klıenti sotqa aryz túsirip, komıssııanyń negizsiz tólegenin dáleldeýi kerek. «Bankter jáne bank qyzmeti týraly» Zańy boıynsha bank komıssııaǵa aqsha ustaıdy jáne onyń quny qansha bolatynyn ózderi belgileıdi. Eki tarap arasyndaǵy daýdy tek sot anyqtap, sheshimi shyǵarylady. Jyl basynan beri biz 70-ten astam sot otyrysyna qatysqan bolatynbyz. Basym bóliginde bankter klıentterine komıssııa shyǵynyn qaıtaryp jatyr. Mundaı jaǵdaı barlyq ekinshi deńgeıli bankterde tirkeldi», - dedi Ulttyq bank fılıalynyń bólim basshysy Janat Aıtbaı.

Aqtóbe oblysy boıynsha sońǵy úsh jylda bankten alǵan nesıeniń komıssııa shyǵynyn qaıtarý aryzy qaralyp jatyr.

Aıta keteıik, Aqtóbe oblysy boıynsha 308 mıllıard teńge nesıelik bereshek bar. Olardyń 24 mıllıard teńgesi problemalyq nesıege jatqyzylǵan. Statıstıkalyq málimetke súıensek, bereshektiń teń jartysy zańdy tulǵalarǵa tıesili.