Aqtóbede bankrot bolǵan zaýyttyń jumysshylary jalaqysyn óndirip aldy
AQTÓBE. QazAqparat – Aqtóbe beımetall qubyrlar zaýytynyń jumysshylaryna 2016 jyldan beri jalaqy berilmegen. Bankrot bolǵan kompanııanyń múlki satyldy, dep habarlaıdy QazAqparat tilshisi.
Osy jyldyń alǵashqy toqsanynda zaýyt jumysshylary kútýden sharshaǵanyn, nesıelerin óteı almaı otyrǵanyn aıtyp, ákimdikke bardy. Kezdesý kezinde zaýyttyń bankrot bolǵany, alǵashqy satylymda ótpeı qalǵany belgili boldy. Keıin jańa ıesi anyqtalyp, aldymen jumysshylar aldyndaǵy qaryzy óteldi.
«Aqtóbe beımetall qubyrlar zaýyty» AQ-y qyzmetkerleri aldyndaǵy jalaqy qaryzyn tolyq ótedi. 2016 jyldan bastap kompanııa 135 qyzmetkerge 63,8 mln teńge kóleminde jalaqy bermegen. Qazirgi kezde 108 adam ózine tıesili aqshany aldy. Ózge adamdar bank kartalaryn jasatyp jatyr. Qujat tapsyrǵan kezde aqsha aýdarylady», - dep habarlady óńirlik kommýnıkatsııalar qyzmeti.
