Aqtóbede bank qyzmetkeri alaıaqtardyń aldyn orap ketti

AQTÓBE. KAZINFORM – Aqtóbede zeınetker 3,5 mln teńge nesıe rásimdep, ony alaıaqtyń esepshotyna aýdarmaq bolǵan. Bank qyzmetkeri birden seziktenip, polıtsııaǵa habar bergen.

Beıtanys adam ózin Ulttyq qaýipsizdik komıtetiniń qyzmetkerimin dep tanystyryp, áıeldi nesıe alýǵa kóndiredi. Hromtaý aýdanynyń turǵyny nesıe rásimdep, aqshasyn qaladaǵy bank arqyly aýdarmaq bolady. 

- Klıentke birneshe suraq qoıyp, mán-jaıdy anyqtaǵym keldi. Aqshany kimge aýdaratynyn suradym. Sol kezde ol ashýlanyp, óz qarjysyn qaıda, kimge aýdarsa da ózi biletinin aıtty. Kúdiktenip, aqshany qaıdan alǵanyn, qansha soma aýdaratynyn naqtyladym. Týysynyń aýyryp jatqanyn, soǵan qajet ekenin aıtyp, túsindirdi. Al qazir prokýratýra, polıtsııamen birge alaıaqtardyń jolyn kesý úshin jumys júrip jatqanyn bilemiz. Sodan men polıtsııa shaqyryp edim, olar 2 mınýtta jetti. Klıent sonda da kelispeı, qarsylyq bildirdi. Úıine ketip qalyp, keıin shynymen alaıaq ekenin bildi, - dedi bank qyzmetkeri Danagúl Myrzataeva. 

Aqtóbe oblystyq polıtsııa departamenti qyraǵy qyzmetkerdi shaqyryp, alǵys hat berdi. Qalalyq polıtsııa basqarmasy Kıberpol tergeý bóliminiń bastyǵy Erkebulan Qaınazarovtyń aıtýynsha, áıel rásimdegen nesıe qarjysyn bankke keri qaıtardy. 

- Áıel aýdanda júrip nesıe rásimdegen, keıin qalaǵa kelip, alaıaqtyń esepshotyna aqsha aýdarmaq bolady. Sol kezde bank qyzmetkeri kúmándanyp, polıtsııaǵa habarlasady.  Jyl basynan beri qalada 160-tan astam is tirkeldi. Internet alaıaqtary kóbine Ulttyq qaýipsizdik komıteti, polıtsııadan habarlasatynyn aıtady. Sonymen birge adamdardyń jeke messendjeri buzylady. Onlaın satyp alýda da aldaıdy, - dedi Erkebulan Qaınazarov. 

Eske salsaq, buǵan deıin Aqtóbede ınternet alaıaqtaryna aldanǵan adamdardyń aqshasyn alyp, ony «jumys berýshisine» aýdaryp otyrǵan kúdikti ustaldy. Ol Reseıge qashyp ketpek boldy.