Aqtóbede balyq aýlaýǵa ketken eki adamnyń denesi ózennen shyǵaryldy

AQTÓBE. KAZINFORM - Aqtóbede osydan eki kún buryn balyq aýlaýǵa shyǵyp, habarsyz ketken eki adamnyń denesi sýdan shyǵaryldy.

14 jeltoqsan kúni Vladımır Kýrdıýkov pen Mıhaıl Dýlıa balyq aýlaý úshin qaladan Temir aýdanyna barǵan. Sodan habarsyz ketip, týma-týystary polıtsııa men eriktilerden kómek surady. Eki kún boıy izdep, polıtsııa olardy ózennen tapty.

- Polıtsııa jedel izdestirý is-sharalarynyń nátıjesinde 1971 jáne 2003 jyldary týǵan eki er adamdy tapty. Olar Temir aýdanynyń Kenjaly ózenine batyp ketken. Súńgýirleri eki er adamnyń denesin avtokólik salonynan shyǵardy. Aldyn ala málimet boıynsha, Nıva avtokóligi joǵary jyldamdyqpen kelip, kópirden ózenge qulaǵan. Atalǵan derek boıynsha sotqa deıingi tergep tekserý júrgizilip jatyr, - dep habarlady Aqtóbe oblystyq PD baspasóz qyzmeti.

Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda 5 bala men 3 eresek adamnyń ólimine qatysty is qaralyp bastady. Júk kóliginiń júrgizýshisine aıyp taǵyldy.