Aqtóbede «Balaýsa» festıvaline qatysýshylar qyzyl kilemmen júrip ótti
AQTÓBE. QazAqparat -Aldaǵy eki kúnde Aqtóbede «Balaýsa» eksperımentaldy ótedi. Búgin ashylý saltanatyna akter Dmıtrıı Dıýjev qatysty, dep habarlaıdy QazAqparat tilshisi.
Elbasy Nursultan Nazarbaevtyń «Rýhanı jańǵyrý» baǵdarlamasy aıasynda «Balaýsa» festıvali ótip jatyr. Bıyl bul festıval Tahaýı Ahtanovtyń 95 jyldyǵyna oraı uıymdastyryldy. Barlyǵy 7 teatr qatysyp, aldaǵy eki kúnde ózderi daıyndaǵan qoıylymdardy sahnalaıdy. Alǵashynda respýblıkalyq bolyp ótken festıval bıyl halyqaralyq deńgeıge kóterildi. Uıymdastyrý jumystaryna barlyǵy 15 mıllıon teńge bólingen. Úzdik áıel rólin, er adamnyń rólin somdaýshylar men dramatýrgııa, rejıssýrasyna baǵa berilgenimen, naqty atalymdary qorytyndy kezinde ǵana berligi bolady.
«Eksperımentaldy festıval kezinde Qazaqstannyń teatr óneri qandaı deńgeıde, damýy qalaı degen suraqtarǵa basymdyq beriledi. Sondyqtan nomınatsııalardyń naqty ataýy joq. Biz qoıylymdy tamashalap, ózindik ereksheligin tańdap alamyz. Osy festıval arqyly akterlik sheberlik, dramatýrgııa, rejıssýranyń damý baǵytyn kórgimiz keledi»,- dedi Qazaqstannyń halyq ártisi, professor Esmuqan Obaev.
Festıvalge qatysýshylar búgin qyzyl kilemmen júrip ótti. Al ashylý saltanatyna akter Dmıtrıı Dıýjev qatysyp, óziniń festıvalge shaqyrǵandarǵa alǵys aıtty.
«Aqtóbede Óner ortalyǵy bar ekenin kórip, qýandym. Onda «Mádenıet-tirshiliktiń tiregi, ortaq ıgilikterdi ulyqtap, ultty uly isterge uıystyrýdyń biregeı tetigi» dep jazýly tur. Ónerdi nasıhattaýshy retinde festıvalge shaqyrǵandaryńyzǵa rahmet aıtamyn. Kóshedegi adamdar «Nege keldińiz? Kimge keldińiz?» dep suraıdy. Men festıval bolyp jatqanyn aıttym. Bilmeıdi. Naǵyz óner súıer adamdar ǵana festıval uıymdastyrady. Adamnyń sanasyn turmys bılemeýi tıis. Olar qoıylymdardy tamashalap, rýhanı azyq alsa deımiz. Bıyl qoıylymdardy tamashalaǵandar keler jyldy asyǵa kútse, óner adamy úshin odan asqan baqyt joq», - dedi D.Dıýjev. Keıin ol festıval qonaqtaryna arnap A.Pýshkınniń «Evgenıı Onegın» monospektaklin sahnalady.
Aıta keteıik, erteń Tahaýı Ahtanov atyndaǵy drama teatrda Ǵ.Músirepov atyndaǵy Qazaq Memlekettik Akademııalyq balalar men jasóspirimder teatry M.Gorkııdiń «Shyńyraý» spektakli, «28 Teatr» G.Bıýhnertiń «Voıtsek» tragedııasy sahnalanady. Al jeksenbide «A.I mýzykalyq teatr jáne prodıýserlik ortalyǵy» J.Rasınniń «Fedra» tragedııasyn, T.Ahtanov atyndaǵy oblystyq drama teatry G.Hýgaevtiń «Qara shekpen» áfsanasyn, Aqtóbe oblystyq «Alaqaı» qýyrshaq teatry S.N.Balykovtyń «Otpýstı povodıa ı letı» qoıylymyn, Almaty memlekettik qýyrshaq teatry Sh.Aıtmatov «Ana - Jer ana» qoıylymyn kórermenge usynady. Sonymen qatar, A.S.Pýshkın atyndaǵy Orsk drama teatry festıvalge L.Dýhanınanyń «Menıa net» qoıylymyn alyp keldi. 
