Aqtóbede balasyn óltirgen adamdy taba almaǵan ana syıaqy taǵaıyndady
AQTÓBE. QazAqparat - Aqtóbede qarbyz satýǵa shyqqan balasynan aıyrylǵan Raıhan Esenamanova 7 aıdan beri kúdiktiniń tabylmaǵanyna alańdap otyr. Ol balasy alyp ketken kólik ıesin aıtqan adamǵa syıaqy taǵaıyndady, dep habarlaıdy QazAqparat tilshisi.
Aqtóbe qalasynyń turǵyny Erhan Tileýmbetov tamyz aıynda qarbyz satý úshin bazarǵa baryp, keıin qymbat kólikke minip ketken bolatyn. Eki aı boıy iz-túzsiz joǵalǵan jigittiń keıin bólshektelgen máıiti tabyldy. Anasy sol kezderi balasyn izdep, bazarǵa barǵan, adamdardan kómek suraǵan.
«Balam joǵalǵan kezde bir aıdan astam ýaqyt boıy bazarda júrdim. Kúnde baryp, satýshylar men ıelerine jalynyp, aıaǵyna jyǵyldym. Olardan eshqandaı kómek bolmady. Polıtsııa alǵashqy kezde izdeý jumystaryna kóp mán bermedi. Qymbat kólik bizdiń qalada kóp emes. Iesin tabýǵa múmkindigi boldy dep esepteımin. Meniń oıymsha, kúdikti bazardyń ishinde. Ulym birinshi ret qarbyz satýǵa shyqty, ol jerdiń zańdylyǵyn bilmeıdi», - dedi Raıhan Esenamanova.
Aıta keteıik, osy oqıǵaǵa baılanysty tergeý jumystary áli júrip jatyr. Kúdikti anyqtalǵan joq.
«Qasaqana kisi óltirý boıynsha tergeý toby jumys istep jatyr. Apta saıyn osy tergeý tobynyń jumysyn qadaǵalap otyrmyz. Qylmys áli ashylǵan joq», - dedi oblystyq ІІD bastyǵynyń birinshi orynbasary Aıdar Tókeev.
Erhan Tileýmbetovtyń anasy balasyn alyp ketken qymbat kólik týraly kez kelgen aqparat bergen adamǵa syıaqy beretinin málimdep otyr.
«Birneshe aı boıy ólimniń jumbaǵyn sheshe almaı otyrmyn. Kúndiz kúlkiden, túnde uıqydan aıyryldym. Polıtsııanyń da esigin tozdyrdym. Olar 7 aıdan beri bir habaryn bermedi. Endi qaıda baramyn? Kinálini qalaı tabamyn? Balamdy óltirgen adam jazasyn alýy tıis. Maǵan basqa eshteńe kerek emes. Balamdy bazardan alyp ketken kóliktiń vıdeosyn taǵy da áleýmettik jelige shyǵardym. Kórgen adam habar berse, qupııa saqtaımyn, syıaqy beremin», - dedi R.Esenamanova.
