Aqtóbede balasyn qum basyp qalǵan ata-ana 2,5 mıllıon teńge ótemaqy surady
AQTÓBE. QazAqparat - Aqtóbe jaǵajaıyndaǵy oqys oqıǵaǵa baılanysty sot otyrysy aıaqtalýǵa jaqyn. Jaryssóz kezinde jábirlenýshi tarap 2,5 mıllıon teńge moraldyq jáne materıaldyq shyǵyn óndirýdi surady, dep habarlaıdy QazAqparat tilshisi.
№2 Aqtóbe qalalyq sotynda Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha is qaralyp jatyr. Jaǵajaıda eki balany qum basyp qalǵan kezde biriniń densaýlyǵyna asa aýyr zardap keldi. Keıin is sotqa jetip, jábirlenýshi tarap oqıǵanyń qalaı bolǵanyn aıtyp berdi. Jaryssóz kezinde aıyptalýshy Arman Qazbaev óz kinásin moıyndamady.
«Sol kúni kommertsııalyq qyzmet kórsetilgen joq. Biraq meniń inim olardyń ótinishine qulaq asyp, jaǵajaıǵa kirýge, tynyǵýǵa jiberdi. Men inimniń sheshimine qarsy bolmaǵanym úshin ǵana kinálimin. Sol kúni jaǵajaıda bolmadym. Men kináli emespin. Keıin men jábirlenýshige óz kómegimdi usyndym. Týǵan-týystarymnan 300 myń teńge jınap berdim. Biraq jábirlenýshiler almady. Olar menen 2 mıllıon teńge surap otyr», - dedi aıyptalýshy Arman Qazbaev.
Jaryssóz kezinde memlekettik aıyptaýshy sot aldynda jaýap berip jatqan aıyptalýshy Arman Qazbaevty kináli dep tanyp, 2,5 jylǵa bas bostandyǵynan aıyrý, ıaǵnı, qylmystyq atqarý júıesiniń qaýipsizdigi tómen mekemesinde jazasyn óteýdi surady.
Sot otyrysy kezinde jábirlenýshi tarap 2,5 mıllıon teńge moraldyq jáne materıaldyq shyǵyn óndirýdi surady.
