Aqtóbede balasyn 60 myń teńgege aıyrbastaǵan kelinshek sottaldy
AQTÓBE. QazAqparat - Aqtóbede balasyn 60 myń teńgege aıyrbastaǵan kelinshek Janna Aqalasova 7 jylǵa sottaldy, dep habarlaıdy QazAqparat tilshisi.
Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq soty búgin aıyptalýshy Janna Aqalasovaǵa qatysty úkim shyǵardy. Buǵan deıin habarlaǵanymyzdaı balasyn 60 myń teńgege aıyrbastaǵan aıyptalýshy keıin óz isine ókingen bolatyn .
«Aıyptalýshy Janna Aqalasova Qylmystyq kodekstiń «Kámeletke tolmaǵandardyń saýdasy» baby boıynsha aıypty dep tanylyp, 7 jylǵa bas bostandyǵynan aıyrylsyn. Jeke menshigindegi múlki tárkilensin», - dedi sýdıa Nurlybek Ormahanov. Al balany baýyryna basatyn adamdy taýyp berip, eki arada deldal bolǵan Danagúl Óteshova 7 jylǵa bas bostandyǵynan aıyryldy. Sýdıa úkim shyǵarar kezde aıyptalýshynyń kishkentaı balasy bar ekenin eskerip, jaza óteý merzimin 5 jylǵa keıinge shegerdi. Al uzaq jyl boıy sábı súıe almaǵan balasy men kelinine balany alyp bergen aıyptalýshy Dına Dosaqova 7 jylǵa shartty túrde bas bostandyǵynan aıyryldy.
Aıta keteıik, buǵan deıin «Úmit» sábıler úıinde bolǵan aıyptalýshy Aqalasovanyń balasyn memleket óz qamqorshylyǵyna aldy.
