Aqtóbede balasy mektepte oramal taǵatyn ata-analarǵa aıyppul salyndy
Aqtóbe qalasynyń bilim bólimi din jolyndaǵy ata-analarmen kezdesip, túsindirý jumystaryn júrgizip jatyr. Olar Bilim jáne ǵylym mınıstrliginiń «Orta bilim berý uıymdary úshin mindetti mektep formasyna qoıylatyn talaptardy bekitý týraly» buıryǵyna súıenip, mektep formasyn saqtamaǵan oqýshylardyń ata-analaryna aıyppul saldy.
«Balalary № 40, 49, 13, 36, 62, 23, 8, 60 jáne 48 orta mektepterde bilim alatyn ata-analar dırektorlardy sotqa berdi. Olar aryzda «balamdy mektepke kirgizbedi» dep jazǵan. Biraq Aqtóbe qalalyq soty mektep dırektorlarynyń áreketin zańsyz dep taný týraly aryzdaryn qanaǵattandyrýsyz qaldyrdy. Bilim salasyn baqylaý departamentinde qazirgi tańda 17 qujat tekserý ústinde. Barlyǵy 6 qujat boıynsha hattama toltyrylyp, ata-analarǵa QR Ákimshilik quqyq buzýshylyq týraly Kodeksiniń 409-baby 2-tarmaqshasy boıynsha ákimshilik jaza qoldanyp, aıyppul salyndy»,- dep habarlady Aqtóbe qalasy ákimdiginiń baspasóz qyzmeti.
Aqtóbe oblysynyń ákimi Berdibek Saparbaev úsh aı ishinde bul daýdy sheship, mekteptegi oramal máselesin túbegeıli joıýdy tapsyrǵan bolatyn. Aqtóbe qalasy boıynsha barlyǵy 179 oqýshy mektepke oramalmen bardy. Kezdesý, túsindirý jumystarynan soń 111 oqýshy qyz oramalyn mektep formasyna aýystyryp, 21 oqýshy qyz otbasylyq jaǵdaılaryna baılanysty basqa oblystardaǵy mektepterge aýystyryldy. Al bir oqýshy densaýlyq jaǵdaıyna baılanysty úıde bilim alyp júr. Ekeýi uzaq merzimge emdelýge jiberildi.
Qazirgi kezde Aqtóbe qalasyndaǵy bilim berý uıymdarynda 44 oqýshy oramal taǵyp júr.
