Aqtóbede balaly bolǵan oqýshyǵa psıhologııalyq kómek kórsetilip jatyr

AQTÓBE. KAZINFORM — Qazir perzenthanada jatqan oqýshynyń da, balasynyń da densaýlyǵy turaqty. Óńirlik balalar quqyqtary jónindegi ýákil jaǵdaıdy baqylaýyna aldy. 

Oqý-aǵartý mınıstrligi Balalardyń quqyqtaryn qorǵaý komıteti Aqtóbe oblysyndaǵy jaǵdaıdan soń pikir bildirdi. 

— Qazirgi tańda oqýshy men sábıdiń densaýlyq jaǵdaıy turaqty. Jasóspirimge qajetti psıhologııalyq kómek kórsetildi. Oqıǵa boıynsha tıisti tergeý amaldary júrgizilip jatyr. Jaǵdaı kámeletke tolmaǵannyń múddelerin qorǵaý maqsatynda óńirlik balalar quqyqtary jónindegi ýákildiń baqylaýynda, — dep habarlady Balalardyń quqyqtaryn qorǵaý komıteti.

Al Aqtóbe oblystyq densaýlyq saqtaý basqarmasy qyzmettik tekserý júrgizý úshin arnaıy komıssııa qurdy. Sebebi oqýshy bıyl úsh ret medıtsınalyq tekserýden ótken. Úsheýinde de onyń júkti ekenin eshkim bilmedi.

Eske salsaq, Aqtóbede oqýshy qyz bosanǵannan keıin qylmystyq is qozǵaldy. Kúdikti anyqtalyp, qamaýǵa alynǵan.