Aqtóbede balalary túnde kóshede júrgen ata-analar aıyppul tóledi
AQTÓBE. QazAqparat - Aqtóbede túngi ýaqytta baqylaýsyz júrgen balalardyń ana-analary ákimshilik jaýapkershilikke tartyldy, dep habarlaıdy QazAqparat tilshisi.
Aqtóbede jasóspirimder arasyndaǵy quqyqbuzýshylyqtyń aldyn alý maqsatynda túngi reıdter kúsheıtildi. Qazir polıtsııa qyzmetkerleri men jastar patrýli birigip, oıyn klýbtary men býkmekerlik keńselerdi baqylaýǵa aldy.
Jasóspirimder arasyndaǵy qylmystyń aldyn alý, kóńil kóterý oryndaryndaǵy qylmysty azaıtý sharalary óńir basshysy Berdibek Saparbaevtyń tóraǵalyǵymen ótken vedomstvoaralyq komıssııanyń otyrysynda da qaraldy.
Jyl basynan beri túngi ýaqytta serýenge shyqqan aqtóbelik jasóspirimderdiń 100-den astam ata-anasy ákimshilik jaýapkershilikke tartyldy. Olarǵa barlyǵy 2 mln teńge aıyppul salyndy. Ótken jyldyń tamyz aıynan beri 2 myńǵa jýyq ata-ana eskertý aldy.
Oblystyq Jastar saıasaty basqarmasynyń basshysy Nurlan Kúntýovtyń aıtýynsha, óńirde «Jas saqshy» jastar patrýli óz jumysyn jalǵastyryp jatyr. Búginde stýdentter birlestiginiń quramynda 100 myńnan asa jas bar.
«Stýdentter jataqhanasynda tártip bolýy tıis. Qylmystyń denin aýdandardan qalaǵa oqýǵa kelgen stýdentter jasaıdy. Olardyń bos júrmeýin baqylaýǵa alyńyzdar»,- dep tapsyrdy Berdibek Saparbaev.
Reıd ári qaraı jalǵasady. Kóńil kóterý oryndary basty nazarda bolady.
«Kóńil kóterýge arnalǵan 10 mekemege jasalǵan eskertýler tolyqtaı joıyldy. Sondaı-aq 15-i berilgen buıryqty oryndap jatyr, úsh nysannyń basshysy ákimshilik jaýapkershilikke tartyldy. Sonymen qatar, eki nysannyń jumysy toqtatyldy», - dep baıandady Kásipkerlik jáne týrızm basqarmasynyń basshysy mindetin atqarýshy Asqar Kókeev.
Budan bólek, Aqtóbede aýlalar men kóshelerde beınebaqylaý kameralaryn ornatý jumystary júrgizilýde. Oblys ortalyǵyndaǵy 278 aýlaǵa 1 358 kamera ornatylǵan. 1 634 kópqabatty úıdiń aýlasy men kireberisi túngi ýaqytta jaryqtandyrylady.
