Aqtóbede balalardyń 28 paıyzy ǵana balabaqshaǵa baryp júr
AQTÓBE. QazAqparat – Elimizde tótenshe jaǵdaı engizilgen soń balabaqshaǵa baratyndar qatary azaıdy. Qazirgi ýaqytta óńirde tek 28 paıyzy ǵana baqshaǵa baryp júr, dep habarlaıdy QazAqparat tilshisi.
Aqtóbe oblystyq bilim basqarmasy, oblystyq jumyspen qamtý jáne áleýmettik baǵdarlamalar basqarmasynyń basshylary onlaın tártipte turǵyndardyń suraǵyna jaýap berdi.
«20 naýryzda balalardyń 28 paıyzy ǵana balabaqshaǵa keldi. Balabaqsha óz rejiminde jumys istep tur. Jeke balabaqshalar da baqylaýda. Eger bala baqshaǵa barmasa, aqysyn tólemeıdi», - dedi Aqtóbe oblystyq bilim basqarmasynyń basshysy Lázzat Orazbaeva.
Aıta keteıik, mektepterde 6 sáýirden bastap qashyqtan oqytý bastalady. Qazir óńirde daıyndyq júrip jatyr.
«Birneshe aýdanda qashyqtan oqytý qıynǵa soǵyp tur. Sebebi ınternet joq. Kolledjderde de osyndaı másele tirkeldi», - dedi Lázzat Orazbaeva.
