Aqtóbede balalardyń betine buryshty gaz shashqan jasóspirim eki aıǵa qamaýǵa alyndy

AQTÓBE. KAZINFORM – Aqtóbe oblystyq mamandandyrylǵan tergeý soty balalardyń betine buryshty gaz shashyp, qoǵam ishinde rezonans týdyrǵan jasóspirimdi eki aıǵa qamaýǵa aldy. Ol sot bolǵansha tergeý ızolıatorynda otyrady.

Aqtóbe qalasyndaǵy kópirlerdiń birinde oınap júrgen balalardyń betine buryshty gaz shashyp, keıin belgisiz baǵytqa qashyp ketken jasóspirim ustaldy. Ony quqyq qorǵaý organdary shekarada quryqtap, keıin Aqtóbe qalasyndaǵy polıtsııa bólimine jetkizdi. Munda ol birden ýaqytsha tergeý ızolıatoryna qamaýǵa alyndy. Endi ol tergeý aıaqtalyp, sot bolǵansha tergeý ızolıatorynda otyrady.

«Aqtóbe oblystyq mamandandyrylǵan tergeý sotyna «A»-ǵa qatysty Qylmystyq kodekstiń «Tonaý», «Buzaqylyq» baptary boıynsha sanktsııalaý týraly ótinish hat tústi. Qylmystyq is materıalyna súıensek, jasóspirim ishimdik ishken kúıi kámeletke tolmaǵan «K»-niń aıaq kıimin alyp ketken. Oǵan keltirilgen shyǵyn kólemi – 16 myń teńge. Keıin «A» buzaqylyq jasap, qolyndaǵy buryshty gaz ballonyn «V» esimdi balanyń betine shashady. Ótinish hatta «A»-nyń ózge el azamaty, Qazaqstanda turǵylyqty jeri joq ekenin aıtylyp, jazadan qutylyp ketý múmkindigi eskerildi. Tergeý soty onyń balalarǵa qarsy asa aýyr qylmys jasaǵanyn, keıin qashyp ketýge oqtalǵanyn negizge aldy. Ol Batys Qazaqstan oblysynyń terrıtorııasynda qolǵa tústi. Eger ol bostandyqta qalsa, qylmystyq jaýapkershilikten qurylyp ketýi múmkin. Sondyqtan Tergeý soty «A»-ny eki aı merzimge ýaqytsha qamaýǵa sheshim shyǵardy», - dep habarlady Aqtóbe oblystyq mamandandyrylǵan tergeý sotynyń baspasóz qyzmeti.

Aıta keteıik, ustalǵan «A» 16 jasta. Ol Reseıden Aqtóbege ákesine kelgen bolyp shyqty.