Aqtóbede balalar bir ǵasyrlyq tarıhy bar dıirmendi tartyp, jarmanyń dámin tatty
AQTÓBE. QazAqparat - Aqtóbe qalasynda Qarǵaly aýylynyń kúnderi ótip jatyr. Qala balalary bir ǵasyrlyq tarıhy bar dıirmendi tartyp, tarynyń jarmasynan dámin tatty, dep habarlaıdy QazAqparat tilshisi.
Aqtóbe qalasyna mereke syılaǵan Qarǵaly aýdany búgin Tuńǵysh Prezıdent atyndaǵy ortalyq saıabaqty án men bıge bóledi. Aýyl ómirin qalaǵa alyp kelgen qarǵalylyqtar bir ǵasyrlyq tarıhy bar dıirmendi tartyp, jarmadan dám tatýǵa múmkindik berdi. Ásirese, balalardyń qyzyǵýshylyǵy erekshe.
«Bala kezde dıirmen tartyp, jarma jegen eresekter sol kúndi eske túsirip jatyr. Al qala balalary dıirmendi, keli-kelisapty bilmeıdi. Olar qyzyqtap, surap, dıirmendi tartyp, tary jarmasynyń dámin tatyp kórip jatyr. Bizdiń maqsatymyz - qazaqtyń salt-dástúrin jańartý, balalarǵa ata-babanyń ómir saltyn úıretý, tanytý. Bul tarıhı jádigerdi Josaly aýylynda turǵany ájemiz Zaǵıpa Ospanova berdi. Qazir dıirmen №2 Badamsha orta mektebinde tur. Qajet kezde paıdalanamyz»,- dedi mektep dırektorynyń oqý isi jónindegi meńgerýshisi Baný Muhtar.
Aıta keteıik, dıirmen ıesi Zaǵıpa Ospanova 80 jastan asqan soń dúnıeden ozǵan. Ol qazaqtyń ulttyq taǵamdarymen jetim balalardy baǵyp, qamqorlyq kórsetken.
«Ájem qurt-irmishik, tary-talqandy ózi daıyndaıtyn. Júz jyldyq tarıhy bar dıirmenmen bizge jarma tartyp beretin. Ol meıirimdi boldy. Ájem daıyndaǵan taǵamnyń bári dámdi boldy. Tipti kórpe tigip, quraq qurady. Bir sózben aıtqanda sheber edi. Máńgi este saqtap, ulttyq saltymyzdy balalarǵa tanytý úshin onyń buıymdaryn mektep murajaıyna tapsyrdyq»,- dedi Rahıma Musabekova.
