Aqtóbede balalar arasynda jiti ishek ınfektsııasyn juqtyrǵandar kóbeıdi

AQTÓBE. KAZINFORM — Bıyl 6 aıda 750-den astam adam jiti ishek aýrýyna shaldyqty. Onyń kóbi bala. 

Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Indıra Aıaǵanovanyń habarlaýynsha, jiti ishek aýrýyna shaldyqqandardyń 95% balalar. Byltyr 6 aıda 600-den astam adam aýyrdy.

— Saralaý kezinde naýqastardyń 21% astamy sút jáne sút ónimderin, 14,4% et jáne et taǵamdaryn, 12,7% kókónis pen jemis-jıdek tutynǵany anyqtaldy. Saqtaý merzimine qaramaǵandary da bar. Sonymen birge balalar taǵamynan, úıde pisken taǵamdy durys saqtamaǵannan da aýyryp, dárigerge qaraldy. Aýrý negizi kóktem jáne jaz aılarynda kóbeıedi, — dedi Indıra Aıaǵanova.

Jiti ishek ınfektsııasy — juqpaly aýrý. Mıkrob adam aǵzasyna túsken soń 2 saǵatta aýrý belgileri anyqtalady. Ol 7 kúnge deıin sozylýy múmkin. Asqazan, ishek joldaryn zaqymdap, dene qyzýy kóterilip, boıdy álsizdik bıleıdi. Epıdemıolog mamandar mundaıda dereý dárigerge qaralyp, em alýǵa shaqyrdy.

Al Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Anarbek Kenjebaevtyń aıtýynsha, oblysta 7 jazǵy lager jumys istep tur. Bul demalys oryndarynda juqpaly aýrý tirkelmedi.

Eske salsaq, Qyzylorda oblysynda jyl basynan beri jedel ishek ınfektsııasyn juqtyrýdyń 342 jaǵdaıy tirkeldi. Bul ótken jyldyń osy merzimimen salystyrǵanda 7 jaǵdaıǵa tómen.