Aqtóbede balalar arasynda qyzylsha juqtyrǵandar kóbeıdi

AQTÓBE. KAZINFORM – Bir aıda 88 adamnan qyzylsha anyqtaldy. Onyń kóbi – bala. 

Aqtóbe oblysynda byltyr bar bolǵany 32 adam qyzylsha juqtyryp, em qabyldady. Al bıyl qańtar aıynda vırýs juqtyrǵandar sany 2,6 ese artty. Barlyǵy 108 adam aýyrǵanyn aıtyp, dáriger kómegine júgingen. Onyń 88-ne qyzylsha dıagnozy qoıyldy.

– Aqtóbe qalasynda 77, Alǵa men Temir aýdandarynda 2, Qobda, Mártók, Shalqar aýdandarynda 1, Muǵaljar aýdanynda 4 jaǵdaı tirkeldi. Olardyń ishinde jasqa tolmaǵan 17 náreste bar. Sonymen birge 1-4 jas aralyǵyndaǵy 57 bala da juqtyryp, em qabyldady. Eresekter men jasóspirimder de vırýs juqtyryp jatyr, - dep habarlady Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Indıra Aıaǵanova.

Onyń aıtýynsha, qyzylsha juqtyrǵan naýqastyń jan-jaǵyndaǵy adamdar 21 kún boıy baqylaýda bolady. Eger olar vaktsına qabyldamasa, ımmýndaýǵa jatady.

Eske salsaq, Aqtóbe oblysynda 2024 jyly 3 700-den astam adam qyzylsha juqtyrsa, byltyr tek 32 derek tirkeldi. Ol úshin óńirde qosymsha vaktsınatsııalaý júrgizildi. Óńirde kishkentaı balalarmen qatar jasóspirimder de ekpe qabyldady.