Aqtóbede balabaqshalar jumysy qashan jandanady
Aqtóbe oblystyq bilim basqarmasynyń basshysy Lázzat Orazbaevanyń aıtýynsha, jumys isteıtin balabaqshalarǵa birneshe talap qoıylady. Aldymen bir kezekshi top bolady. Jatyn bólmede 1 metr araqashyqtyq saqtalýy mindetti. Sonymen birge ár topqa 15 balaǵa deıin ǵana qabyldanady. Kún saıyn tańerteń medıtsına qyzmetkeri bala men tárbıeshini, bala kútýshilerdiń densaýlyǵyn tekseredi. Jótelip, dene qyzýy kóterilip, jedel respıratorly vırýstyq ınfektsııa juqtyrǵan bolsa, bala qabyldanbaıdy, qyzmetker jumys isteı almaıdy.
«Úsh kún boıy balabaqshaǵa kelmeı qalmasa, ádettegideı anyqtama qujaty suralady. «COVID-19» vırýsyn juqtyrǵandarmen baılanysta bolǵan, ózge aımaqtan kelgen, júkti, 65 jastan asqan, jedel respıratorly vırýstyq ınfektsııa juqtyrǵan adamdar balalardy baqshaǵa ákelmegeni jón. Ár balabaqsha dezınfektsııalyq suıyqtyqty qoljetimdi jerge qoıýy tıis. Tárbıeshiler tamaq isher aldynda, odan keıin, serýendegende qoldy sabyndap jýýdy qadaǵalaýy tıis. Balalardyń bólmesin kvarts shamy qoldanylyp, bólme ishi jıi jeldetilýi qajet. Ázirge daıyndyq júrip jatyr. Eger ruqsat berse, 18 mamyrdan keıin balabaqshalar jumys isteıdi», - deıdi oblystyq bilim basqarmasynyń basshysy Lázzat Orazbaeva.