Aqtóbede balabaqshaǵa berilgen jer telimi memleketke keri qaıtaryldy
AQTÓBE. QazAqparat - Aqtóbede «saqaldy qurylystar» arasynda qonaq úı, balabaqsha, janar jaǵarmaı beketi, kópqabatty turǵyn úı bar, dep habarlaıdy QazAqparat tilshisi.
Aqtóbe qalasynda kommertsııalyq maqsatta berilgen jer telimderi qaıta tekserildi. Sebebi, sońǵy jyldary qalada qurylysy toqtap turǵan nysandar sany kóbeıip ketti. Tekserýden soń 81 menshik ıesine qatysty jer telimin tekserý úshin Aqtóbe oblystyq jer ınspektsııasyna hat joldandy. Barlyǵy 34 jer telimi maqsatty paıdalanylmaı, olarǵa nusqama berildi. Eger jer ıesi zań buzýshylyqtardy qalpyna keltirmese, mekshikti jerin memleketke keri qaıtarady.
«Barlyǵy 17 jer telimi sot arqyly memleket menshigine qaıtaryldy. Máselen, «SNPS-Aqtóbemunaıgaz» AQ demalys ortalyǵyna arnalǵan 35 gektar jer telimin sońǵy 5 jylda maqsatty paıdalanbaı keldi. Іri munaı kompanııasy bir jylda zańsyzdyqty joıý kerek. Al qurylysy uzaqqa sozylǵan nysandar arasynda qonaq úı, balabaqsha, janar-jaǵarmaı beketi bar. Jeke kásipker Ájibaevaǵa tıesili qonaq úı qurylysy 8 jyldan beri toqtap tur. Biz tekserý júrgizip, tehnıkalyq jaǵdaıyn bildik. Sotqa aryz jazyp, qurylysty aıaqtaýǵa kelisim jasaldy. Olarǵa 1,5 mıllıon teńge aıyppul salyndy. Ári qurylys banktiń kepildiginde tur. Qurylys aıaqtalsa, basqa adamǵa satýǵa bolady»,- dedi Aqtóbe qalasynyń ákimi Іlııas Ispanov.
Aqtóbe qalasyndaǵy Bolashaq yqsham aýdanynda balabaqsha qurylysy toqtap tur. Birneshe jyl boıy óz mindetin oryndaı almaǵan kompanııa jerdi memleketke keri qaıtarýǵa májbúr boldy. Aqtóbe qalasynyń ákimi Іlııas Ispanovtyń aıtýynsha, janar-jaǵarmaı beketi, avtomektep, medıtsınalyq ortalyq, demalys oryndaryna, turǵyn úıge arnalǵan ǵımarattarǵa qaıta jospar jasalyp, jańa talaptar qoıyldy. 
