Aqtóbede balabaqsha terezesinen qulap ketken sábıdiń anasy oqıǵanyń mán-jaıyn aıtyp berdi
AQTÓBE. QazAqparat – Aqtóbede úsh jastaǵy balanyń balabaqsha terezesinen qulap ketkenin tárbıeshiler emes, aldymen qurylysshylar kórip, balabaqshaǵa ákelgen, dep habarlaıdy QazAqparat tilshisi.
Úsh jastaǵy balanyń jaǵdaıy birqalypty, aýrýhanada em qabyldap jatqanyn jazǵan bolatynbyz. Búgin tárbıeshiniń jumystan shyǵyp ketkeni belgili boldy.
«Bizdiń balabaqshanyń terezesi ashylady. Sol kúni bala terezege minip, ony ashyp, qulap ketken bolýy múmkin. Tárbıeshi balalardy uıyqtatpaq bolyp sheshindiredi, kereýetterine jatqyzady. Sol kezde balanyń ketip qalǵanyn baıqamaı qalǵan. Topta barlyǵy 22 bala bar», - dedi «Nur Zerek» balabaqshasynyń meńgerýshisi Aınagúl Jumaǵulova. Qazir balalardy baqylaı almaǵan tárbıeshi óz erkimen jumystan shyqqan. Al balabaqshanyń ár terezesine qulyp salynady.
«Sanıtarlyq-epıdemıologııalyq talap boıynsha terezelerge tor qondyrý qarastyrylmaǵan. Tek qulyptalatyn bolady», - dedi meńgerýshi.
Al dárigerler balanyń jaǵdaıyn baqylaýda ustap otyr.
«Mı jaraqatyn alyp, aıaǵy synǵan. Qazir balanyń jaǵdaıy turaqty, em qabylap jatyr», - dedi oblystyq balalar aýrýhanasynyń bas dárigeriniń orynbasary Saǵıdolla Dosmaǵanbetov.
Anasy balasynyń dári kúshimen ǵana jatqanyn aıtyp otyr.
«Egiz balamdy jeke balabaqshadan shyǵaryp alyp, memlekettik-jekemenshik balabaqshaǵa berdim. Bul jer keń de jaıly kórindi. Sol kúni eki balam da terezeniń aldynda júrgen. Janyna úshinshi bala mingen. Sol kezde ulym Zahar qulap ketken. Ekinshi balamnyń aıtýynsha aýrýhanaǵa da alyp ketken er adam eken. «Aǵa» dep otyrǵany qurylysshylar. Bala qulap, ony syrtta júrgen qurylysshylar kórip, balabaqshaǵa ákelgen. Sol kezde ǵana tárbıeshiler jedel járdem shaqyrǵan», - dedi Zahardyń anasy Gaýhar Shynbaeva.
Aıta keteıik, balalardyń «Nur Zerek» balabaqshasyna baryp júrgenine eki aı bolǵan. Qazir osy derekke qatysty «Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý» baby boıynsha tergeý júrip jatyr. Balalardyń anasy eki ulyn balabaqshadan shyǵaryp aldy.
