Aqtóbede balabaqsha ornyna dúken salmaq bolǵan kásipkerdiń isi áshkere boldy
AQTÓBE. KAZINFORM – Baıqadam turǵyn alabyndaǵy balabaqshaǵa arnalǵan orynǵa kólikke tehnıkalyq qyzmet kórsetý orny men dúken salmaq bolǵan kásipker qurylysty toqtatty. Turǵyndar 30 sottyń jerdiń bárine úlen balabaqsha salýdy surady.
Aqtóbe qalasynyń irgesindegi Baıqadam turǵyn alabynda 1 200 jer telimi berilgen. Qazirgi kezde mundaǵy jer teliminiń basym bóliginde úı salynyp, adamdar turyp jatyr. Turǵyndar bolsa balalaryn qaladaǵy balabaqshalarǵa tasymaldaýǵa májbúr.
– Bizdiń aýyl mańyndaǵy Baýyrlastar-1 turǵyn alabynyń balabaqshasyna balalar syımaıdy. Balaǵa qaraý úshin ákesi nemese sheshesi jumys istemeýi kerek. Kóligi bar adamdar qalaǵa tasıdy, ózgesi úıde otyr. Byltyr balalardyń oıyn alańyna oryn joq dep aıtty. Bos jatqan jerdi suraǵan kezde balabaqshaǵa arnalǵanyn eskertti. Bul aýdany 30 sotyq jer. Al bıyl bir apta buryn jeke kásipker «20 sotyǵyna balabaqsha, 10 sotyq jerge tehnıkalyq qyzmet kórsetý ornyn salamyn» dedi. Oǵan kelispeımiz, - dedi aýyl turǵyny Almaz Jaqsybekov.
Turǵyndardyń biri bul jerge dúken de salynbaýy kerek dep basa aıtty. Sebebi aýylda balabaqshaǵa ózge oryn qarastyrylmaǵan. Al kásipker bolsa bir bóligine ǵana balabaqsha salmaq bolǵanyn jasyrmady.
– Men jerdi 2022 jyly aýktsıon arqyly aldym. Nysanaly maqsaty – balabaqsha. Endi garaj, dúken salmaımyn, halyq narazy. Qasyna sııady dep oılap, saldym. Qurylysty toqtatyp, balabaqsha salamyn. Jobasyn ózgertemin, 2 qabatty bolady, - dedi kásipker Qudaıberdi Tapaev.
Turǵyndar jınalǵan jerge Aqtóbe qalalyq jer monıtorıngi mekemesiniń basshysy Almat Ysqaqov ta keldi. Ol balabaqsha ornyna nege ózge nysan salynyp jatqanyn túsinbedi.
– Bul jer ýchaskesi 2022 jyly shilde aıynda aýktsıon arqyly alynǵan. 2023 jyldyń qyrkúıek aıynda ǵımaratqa sáýlet-josparlaý ruqsaty berildi. Sol qujatta kóliktiń dıagnostıka ortalyǵy men dúken jelisi jazýly tur. Alaıda bul jer balabaqshaǵa arnalǵan. Qazirgi tańda jer paıdalanýshymen sóılestik. Olar balabaqsha salady. Men qurylysshy emespin, ne salynyp jatqanyn bilmeımin. Endi qaıta joba daıyndaý kerek, - dedi ol.
Eske salsaq, Aqtóbeniń shalǵaı aýyldary ǵana emes, qala mańyndaǵy turǵyn alaptarda da sý tapshy. Ortalyqtandyrylǵan sý júıesin tartý jumysy 4 eldimekende ázir júrgizilmeıdi. Sebebi bul aýyldardan sý qory tabylmady.