Aqtóbede bala urǵan tárbıeshi isi boıynsha komıssııa sheshimi shyqty
AQTÓBE. QazAqparat - «Shaǵala» shıpajaıynda balany uryp, jumystan shyǵyp ketken tárbıeshi isine qatysty komıssııa qorytyndysy jarııalandy, dep habarlaıdy QazAqparat tilshisi.
«Tekserý kezinde balaǵa kúsh qoldaný deregi rastaldy. Oblystyq balalar súıek-ókpe týberkýlezi shıpajaıy bas dárigerine qatań sógis berilip, bas dárigerdiń orynbasary jumystan ketti. Oqıǵaǵa kýá bolǵan, biraq esh shara qoldanbaǵan medbıkege qatań sógis jarııalandy», - dedi oblystyq densaýlyq saqtaý basqarmasy basshysynyń orynbasary Svetlana Esenamanova.
Bilim salasynyń qyzmetkerleri de jazalandy. Em qabyldap jatqan balany uryp-soqqan eki tárbıeshi jumystan bosatyldy. Komıssııanyń tekserý jumysynan soń psıholog óz erkimen jumysynan ketti. Shıpajaıda tárbıe jumysyna jaýapty qyzmetker de 10 naýryzdan bastap jumystan shyǵaryldy.
Aıta keteıik, 1 naýryz kúni bolǵan oqıǵa eldi shýlatqan bolatyn.
Aqtóbe oblystyq polıtsııa departamenti baspasóz qyzmetiniń jetekshisi Erbolat Sarqulovtyń aıtýynsha, Almaty aýdandyq polıtsııa bólimi Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha is qozǵalyp, tergeýdi bastady.
Birneshe sot-medıtsınalyq saraptama taǵaıyndaldy.
