Aqtóbede «Baqytty bala» jobasy qorytyndylandy
AQTÓBE. QazAqparat - Aqtóbe oblysynda Bala jyly aıasynda jarııalanǵan «Baqytty bala» aýqymdy jobasy qorytyndylandy, dep habarlaıdy QazAqparat oblys ákiminiń baspasóz qyzmetine silteme jasap.
Sharaǵa QR Parlamentiniń Senat jáne Májilis depýtattary, halyqaralyq jáne úkimettik emes uıym ókilderi, Aqtóbe men oblystyń barlyq aýdandarynan kelgen balalar qatysty.
«Bıyl - qazaqstandyqtar úshin ulttyq-rýhanı jáne jalpy adamzattyq qundylyqtardyń órkendeý jáne jańa kúshpen damý jyly. Memleket basshysynyń tapsyrmalaryna, «Rýhanı jańǵyrý» baǵdarlamasyna sáıkes, oblysta aǵymdaǵy jyl - Bala jyly dep jarııalanǵan bolatyn. Onyń aıasynda ótkiziletin sharalar «Baqytty bala» jobasyna biriktirildi. Jyl basynan beri joba aıasynda kóptegen mańyzdy bastamalar júzege asyryldy. Barlyq kásipkerlerge, kompanııalar men uıymdarǵa, Aqtóbe qalasy men aýdan ákimderine jobaǵa qatysqandary úshin oblys basshylyǵy atynan alǵys aıtamyn. Elbasy 2019 jyldy jastar jyly dep jarııalaýyna baılanysty joba kelesi jyly óz jalǵasyn tabady», -dep atap ótti oblys ákimi Berdibek Saparbaev.
«Baqytty bala» jobasy ıÝNISEF, BUUDB halyqaralyq qoǵamdyq uıymdary, qaıyrymdylyq qorlar, QR Bilim jáne ǵylym mınıstrliginiń qoldaýymen júzege asyrylǵan bolatyn.
«Jobanyń tek Qazaqstanda ǵana emes, TMD elderinde de balamasy joq. Oblysta balalardy, ásirese múmkindigi shekteýli balalardy qoldaý jáne qorǵaýda úlken jumystar atqarylyp jatyr. Bul tájirıbeni ózge óńirlerge de taratý kerek», - dep atap ótti QR BǴM vıtse-mınıstri Elmıra Sýhanberdıeva.
Tek bıyldyń ózinde Aqtóbe oblysynda elimizdegi tuńǵysh jyl boıy saýyqtyratyn ınklıýzıvti «Kúnshýaq» lageri qurylyp, bıýdjet qarajatynan tys qarjyǵa aýtızmi bar balalarǵa arnalǵan ortalyq, korrektsııalyq balabaqsha, múmkindigi shekteýli balalardy ońaltý ortalyǵy ashyldy.
177 sporttyq-oıyn alańy, jazǵy Akvapark, Muz saraıy, Tennıs ortalyǵy paıdalanýǵa berildi, jeńil atletıkalyq manejdiń qurylysy júrip jatyr. 25 IT-klass ashyldy, mektepter 24 3D-prınterlermen, 27 robot tehnıkasynyń jıyntyǵymen, 28 ýltraqysqa fokýsty proektormen jabdyqtalǵan.
Oblystaǵy 120 myń bala jazǵy demalyspen qamtyldy, sonyń ishinde 15 myń bala Qazaqstannyń kıeli jáne kórikti jerlerine attansa, 700-den asa daryndy bala elimizdegi, alys-jaqyn shetelderdegi úzdik jazǵy saýyqtyrý jáne bilim berý lagerlerinde bolyp qaıtty. Sondaı-aq, tuńǵysh ret oblysta «Ásem» jyl boıǵy oqý-tanymdyq lageri ashyldy.
Joba aıasynda jetim jáne ata-ana qamqorlyǵynsyz qalǵan balalardy jan-jaqty qoldaýǵa da basymdyq berildi. Nátıjesinde kásiporyndar men memlekettik organdar balalardyń TQJB-degi esepshottaryn jyl basynan beri 80 mln teńgege tolyqtyrǵan, 81 jetim balaǵa jańa páterler men úılerdiń kilti tabys etildi.
