Aqtóbede «Baqytty bala» birinshi vokaldyq baıqaýynyń jeńimpazdary anyqtaldy
AQTÓBE. QazAqparat -Aqtóbe qalasynda halyqaralyq «Baqytty bala» baıqaýy qorytyndylandy. Bas júlde eki ónerpazǵa berildi, dep habarlaıdy QazAqparat tilshisi.
Aqtóbede búgin «Baqytty bala» vokaldyq baıqaýy qorytyndylandy. Buǵan deıin habarlaǵanymyzdaı, baıqaýǵa 10-15 jas aralyǵyndaǵy 20 ónerpaz qatysty. Barlyǵy 420 ótinish túsken bolatyn. Festıvaldiń gala kontserti kezinde «Vıtebskidegi Slavıan bazary» halyqaralyq baıqaýynyń jeńimpazy Lýıza Nurqýatova, «Slavıan bazary-2017» baıqaýynyń jeńimpazy Vlad Sytnık, armıan ánshisi Djordan Arakelıan, áýe gımnasty Anastasııa Dıdýh pen «Golos. Ditı» vokaldyq konkýrsynyń jeńimpazy Danelııa Tóleshova jáne ánshi Dımash Qudaıbergen án shyrqady. Sonymen qatar, eń úzdik ónerpazdar án aıtty.
«Biz qosymsha kúsh, jiger, qaırat aldyq. Ónerdiń, mádenıettiń qudyreti osynda. Bárimiz ónerdiń aldynda basymyzdy ıemiz. Dúnıede baladan asyl, balalan tátti eshteńe joq. «Baqytty bala» aktsııamyz da osy balalarǵa arnalǵan. Dımashqa, Qanat Aıtbaevqa alǵysymyzdy aıtamyz. Aktsııa aıasynda Qazaqstanda birinshi ret vokaldyq baıqaý ótkizdi. Ári óńirge 10 memlekettiń ókili keldi. Bul Aqtóbe úshin mereke, qýanysh. Ózge eldiń azamattary kelgen qonaqtar arqyly Aqtóbe qalasyn, Qazaqstan memleketin biledi»,- dedi oblys ákimi Berdibek Saparbaev.
Baıqaý qorytyndysynda júldesiz qalǵan eshkim bolmady. «Baqytty bala» halyqaralyq vokaldyq balalar festıval-baıqaýynyń bas júldesin aqtóbelik Narǵyz Januzaqova, Erjan Maksım aldy. Ár ónerpazǵa 1 mıllıon teńgeniń sertıfıkatyn tabys etildi. Aqtóbelik Mırjan Jıdebaı, pavlodarlyq Marııa Zatvarnıtskaıa jáne Almatydan kelgen Aıkenaı Ordına I dárejeli laýreat atanyp, árqaısysyna 500 myń teńgeniń sertıfıkaty berildi. Aqtóbe oblysynan qatysqan Canat Asýat, Grekııa ónerpazy Ioannıs Lazopýlos, aqtóbelik Rahman Satıev II dárejeli laýreat atandy. Olarǵa da 500 myń teńgeden berildi. Al Marııa Mahlına, Nazgúl Baımenova, Robııa Mırzaeva III dárejeli laýreat atandy. Júldegerlerdiń árqaısysyna 500 myń teńge berildi. Vokaldyq balalar festıval-baıqaýynyń «Kórermender kózaıymy» nomınatsııasynyń ıegeri Saıa Seılhanova, «Úmit» nomınatsııasynyń ıegeri Erkin Qajymurat, «Sahna súıkimdisi» nomınatsııasynyń ıegeri Sanııa Altynbekqyzy, «Dostyq elshisi» nomınatsııasynyń ıegeri Arına Dıdenko, «Úmit» nomınatsııasynyń ıegeri Adelına Muhametjanova boldy. Ónerpazdar Lıýbov Grıtsenko, Balaýsa Sansyzbaı, Ásııa Musaǵalıeva «Baqytty bala» halyqaralyq vokaldyq balalar festıval-baıqaýynyń dıplomanty atandy. Al «Joldasov production» prodıýserlik ortalyǵynyń arnaıy syılyǵy Erasyl Muqanovqa buıyrdy. Ol tegin án jazdyra alady. Buǵan deıin habarlaǵanymyzdaı, aqtóbelik ónerpaz Narǵyz Januzaqova Dımash Qudaıbergenniń kontsertine qatysady.
«Dımash Qudaıbergendi kórý úshin baıqaýǵa arnaıy qatysyp, búgin bas júldeni alyp otyrmyn. Tipti, jeńimpaz atanamyn dep oılaǵan joqpyn. Qýanyshymda shek joq. Baıqaý arqyly kóp dos taptym ári ózim armandaǵan ánshi aǵam Dımash Qudaıbergenmen kezdestim. Jylaǵym kelip tur, biraq kózimnen jas shyqpady»,- dedi bas júlde ıegeri Erjan Maksım.
