Aqtóbede azyq-túlik ónimderinen sanıtarlyq buzýshylyqtar anyqtaldy
AQTÓBE. QazAqparat - Aqtóbede ótken jyly sanıtarlyq talaptardy buzǵan otandyq tamaq óndirýshiler anyqtalyp, olardyń jumysy ýaqytsha toqtatyldy, dep habarlaıdy QazAqparat tilshisi.
Aqtóbedegi qoǵamdyq densaýlyq saqtaý departamenti 2017 jylda atqarylǵan jumystardy qorytyndylady. Ótken jyly bir kondıter tsehy, qoımalar men dúken, bazar, tipti, meıramhana jumysyn ýaqytsha toqtatty. Sanıtarlyq talapty buzǵandarǵa 18 mıllıon teńgeden astam aıyppul salyndy.
«Azyq-túliktiń sapasyn tekserý úshin bazardan taýar satyp alý qıyn. Sebebi, olarda arnaıy apparat bolmaıdy, chek berilmeıdi. Al memlekettik mekeme taýardy satyp alyp, onyń sapasyn tekserýi úshin apparaty bar dúkenderdi izdeıdi. Kassalyq apparat máselesin Memlekettik kirister departamentine aıtyp, jumys júrip jatyr. Zańbuzyshylyqtardyń kóbi tańbalaýda tirkeledi. Tehnıkalyq reglament boıynsha shyǵarylǵan merzimi, saqtaý ýaqyty, óndirýshiniń ataýy, mekenjaıy jazylmaıdy, memlekettik tilde ataýy kórsetilmeıdi»,- dedi Aqtóbe oblystyq qoǵamdyq densaýlyq saqtaý basqarmasynyń basshysy Nursulý Berkimbaeva.
Ótken jyly sanıtar mamandar barlyǵy 1634 taýardy satyp alyp, teksergen.
«Otandyq óndirýshilerdiń ishinde sút jáne sút ónimderin shyǵaratyn aqtóbelik «Agrofırma Taý» JShS, qostanaılyq «Lıder-2010» JShS, astanalyq «MZ Stolıchnyı» JShS bar. Al Aqtóbedegi «Anvar» JShS-de et óniminen ishik taıaqshasy anyqtaldy. Sonymen qatar, qus etin óndiretin «Kóktas Aqtóbe», Soltústik Qazaqstan oblysynyń «PSH» JShS taýary synamaǵa sáıkes kelmedi. Reseıdiń «Jelen» et komıtnatynyń ónimi, balyq ónimderin satatyndardyń «Grınadını» JShQ-nyń taýary jáne Krasnodar qalasynan jetkizilgen «Dary morıa» pasterlengen túıirshikti qara jáne qyzyl ýyldyryǵy talapqa saı kelmedi»,- dedi Nursulý Berkimbaeva.
Sondaı-aq atap ótilgendeı, Qostanaı, Soltústik Qazaqstannan jetkizilgen sút ónimderiniń sapasy syn kótermeı, maılylyǵy men ylǵaldy saqtaýy erejesi buzylǵan bolyp shyqty.
Tekserister nátıjesi boıynsha, satylymnan 180 keli ónim alyndy, 249 keli ónim jetkizip berýshige keri qaıtaryldy, olar jaramsyz tanylyp, joıyldy.
