Aqtóbede «Azattyqtyń aq tańy» memorıaldyq kesheni ashyldy
Sharaǵa oblys ákimi Ońdasyn Orazalın, Temirbek Júrgenov pen Uzaqbaı Qulymbetovtiń týystary, qoǵam qaıratkerleri men óńirdiń ǵylymı zııaly qaýym ókilderi qatysty. Keshenniń ashylýynda «Alash urany» ánurany oryndalyp, «Alash» partııasynyń týy kóterildi.
«Eń qıly kezeńderde halqymyzdyń jigeri jasyp, qaıraty qaıtqan joq. Azattyq jolynda qurban bolǵan asyl azamattardyń erligi arqasynda Táýelsizdikke qol jetkizdik. Sóıtip tarıhtyń kóleńkeli tustaryn qaıta zerdelep, joǵalǵan rýhanı qundylyqtardy qalpyna keltirýdi qolǵa aldyq. Búgingi urpaq Táýelsizdik úshin kúresken azamattardy ulyqtap, olardyń taýqymetke toly taǵdyrynan taǵylym alýy tıis. Tarıhtan taǵylym almaǵandar úshin qasiret árdaıym qaıtalanady. Búgingi «Azattyqtyń aq tańy» tarıhı kesheni Táýelsizdik jolynda kúresken Alash qaıratkerlerine, olardyń murasyna degen adaldyǵymyzdy ańǵartý maqsatynda ashylyp otyr. San ǵasyrlar armandaǵan tuǵyrly Táýelsizdikke qol jetkizgen búgingi urpaq babalar rýhyna bas ıip, taǵzym etedi. Tarıhı jadymyzdy jańǵyrtýǵa baǵyttalǵan isimiz ońynan bolsyn», - dedi oblys ákimi Ońdasyn Orazalın.
Memorıaldyq keshenge «Alash» partııasynyń Álıhan Bókeıhan, Ahmet Baıtursynov, Mustafa Shoqaı, Halel Dosmuhamedov, Mirjaqyp Dýlatov, Jahanshy Dosmuhamedov, Maǵjan Jumabaev, Teljan Shonanov, Temirbek Júrgenov, Uzaqbaı Qulymbetov, Muhamedjan Tynyshbaev syndy belgili qaıratkerleriniń barelefti beıneleri bar. Álııa Moldaǵulova men Táýelsizdik dańǵyldarynyń qıylysynda ornalasqan relefti kompozıtsııanyń bıiktigi 5 metr, al uzyndyǵy 7 metr. Joba avtory – músinshi Jeńis Jubanqosov.
