Aqtóbede aıyptalýshy uıqysy qanbaǵany úshin sotty keıinge shegerýdi surady

Aqtóbe oblystyq qylmystyq ister jónindegi mamandandyrylǵan aýdanaralyq sotynda Erkin Іzbasar, Aýhat Qalıev, Qaldymurat Qartjan, Murat Turjanov, Nurlan Noǵaev, Jandos Aqmaǵambetovke qatysty reıderlik jolmen tartyp alý epızody qaraldy. Qylmystyq kodekstiń «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý», «Senip tapsyrǵan bóten múlikti ıemdenip alý nemese talan-tarajǵa salý» baptary boıynsha aıyptalýshylar men jábirlenýshilerden jaýap alý bastaldy.

«Men tańǵy saǵat 5-te jatyp, 7-de uıqydan turdym. Eki saǵatta uıqym qanbady. Úıde aýyratyn anam bar, basqa da sharýalarym shyǵyp qaldy. Búgin «Tazadalakom» JShS-ne qatysty epızod qaralady dep oılaǵan joqpyn. Biraq men daıynmyn. Tilshilerdi shaqyryp, kórsetýlerin suraımyn. Sebebi, tirnektep jınaǵan abyroıym tógildi. Uıymdasqan qylmystyq top qurdy, munaı urlady dep aıyptalǵan toptyń tizimine enip ketkenmen. Ózim - emshimin. Meni sýretten kórip, tanyp qalǵan adamdar emge kelýdi toqtatty, týǵan-týystarym áńgimege qosty. Bir jyl boıy mazalady. Men abyroıymdy qorǵap qalamyn»,- dedi aıyptalýshy Jandos Aqmaǵambetov.

Aıta keteıik, sot otyrysy kezinde jábirlenýshi B. «Tazadalakom» JShS 2008 jyly qurǵanyn jetkizdi. Bul kompanııa munaı qaldyqtaryn saqtaıtyn polıgon ashyp, qaldyqty óńdep, zalalsyzdandyrǵan. Alǵashynda kompanııany úsh adam ashty. Biri ıdeıa aıtyp, ekinshisi qujattardy jınap, úshinshisi qarjy saldy. Keıin taǵy eki adam qatarǵa qosyldy. Al 2012 jyly salyq basqarmasymen qıyndyqtar bolyp, kompanııa tabysy beske bólindi. Sol kezde kompanııa ıesi óziniń 80-nen asqan ákesine úlesin aýdarǵan. Búgin sot otyrysy kezinde ákesi men balasy jábirlenýshi tarap retinde jaýap berdi.

«Men sottalýshylar arasynan Nurlan Noǵaevty ǵana tanımyn. 2008 jyly «Tazadalakom» kompanııasyn ashtym. 2012 jyly salyqtyq qıyndyqtar bolyp, tórt seriktes ózderine tıesili úlesti alyp, bólindi. Mende 60 mıllıon teńgeniń qural-jabdyǵy men kompanııa qaldy. Ol kezde men Nurlan Noǵaevtyń qaıyn atasymen tanys boldym. Qaıyn atasymen sóılesip, salyqtyq máseleler boıynsha keńes bere alatyn adam bar ma dep suradym. Sol kezde qaıyn atasy kómektesetinin, kúıeý balasyna 30 paıyzdyq úlespen kompanııaǵa kirýdi usyndy. Jumys júrdi, sol kezde Noǵaevtyń páteriniń nesıesi sheshildi. Kompanııada dırektordyń orynbasary boldy. Keıin Qytaıdan qural-jabdyq alýǵa dep bólingen 10 mıllıon teńgeni Noǵaev óz qajettiligine jumsady»,- dedi jábirlenýshi B.

Sot otyrysy kezinde jábirlenýshi B. óndiris máseleleri jónindegi orynbasaryna jumysty senip tapsyryp, issaparǵa ketkenin jetkizdi. Sol kezde ol óz kompanııasynan aıyrylyp qalǵan.

«Ákem úlesker bolǵanymen, meniń jumysyma aralasqan joq. Qujatqa qol qoıý qajet bolǵanda kedergi bolmaýyn qaladym. 10 kúnnen soń orynbasarym habarlasyp, dırektordy ózgertý týraly hattamaǵa qol qoıǵanyn aıtty. Ony qorqytqan. Biraq is aıaqtalmady. Zańgerlerge barǵanda qaıta jınalys ótkizýdi usyndy. Azamattyq aryz túsirip, birneshe ret sotta jeńildik. Meniń 70 paıyzdyq úlesim qaıda ketkenin bilmeımin. Qazir 50-60 mıllıon teńge salyqtyq tólem meniń atymda tur. Ózim namaz oqımyn. Jumysshylardyń kóbi din jolyn ustanýshylar boldy. Olar jumysqa ornalasa almaǵan soń maǵan keldi. Jumysshylarymyz 70-80-ge jetti»,- dedi jábirlenýshi B.

Aıta keteıik, jábirlenýshi B. sottalýshy N.Noǵaevtyń suraqtaryna jaýap bere almady. Arada 4 jyl ótkende kóp jaıt esinde qalmaǵan. Sonymen qatar, ol basty aıyptalýshy Erkin Іzbasardy tanymaıtynyn, jumys kezinde onyń aty-jóni múlde atalmaǵanyn jetkizdi.

Sot otyrysy erteń jalǵasady.