Aqtóbede áıelin uryp óltirgen er adamǵa 8 jyl jaza kesildi

ASTANA. KAZINFORM — Aqtóbe qalasynyń № 2 soty áıeliniń ólimine sebep bolǵan, onyń densaýlyǵyna qasaqana aýyr zııan keltirgen turǵyndy kináli dep tanyp, 8 jylǵa bas bostandyǵynan aıyrdy.

Sot er adamnyń áıeliniń basynan birneshe ret urǵanyn, sodan keıin onyń jaǵdaıy kúrt nasharlaǵanyn anyqtady.

— Áıel tósekten turmaǵan jáne úıden shyǵýdy qoıǵan. Alǵash ret jedel járdem shaqyrylǵanda dárigerler aýrýhanaǵa jatqyzýdy usynǵanmen, jábirlenýshi odan bas tartqan. Ekinshi ret jádel járdem shaqyrǵan kezde ol aýrýhanaǵa jetkizilgen, biraq jansaqtaý bóliminde qaıtys bolǵan, — delingen habarlamada.

Sonymen qatar, sot otyrysy barysynda sottalýshynyń sodan bir aı buryn áıeline zorlyq-zombylyq kórsetkeni rastaldy.

— Úıde onyń betinen úsh ret urǵan, al jábirlenýshi ózin qorǵamaq bolǵanda taǵy eki ret urǵan. Áıel soqqydan qulaǵan, biraq ol kezde aýrýhanaǵa barmaǵan. Sot-medıtsınalyq saraptamanyń qorytyndysyna sáıkes, ólimge bas mıynyń travmatıkalyq isinýine qan ketýmen jabyq bas súıek-mı jaraqaty ákelip soqtyrǵan. Sarapshylar aýyr zardaptyń ólimnen bir kún buryn bolǵanyn jáne oǵan jetkilikti kúshpen bir soqqynyń áserinen bolýy múmkin ekenin anyqtady. Jaraqattardyń qulaýynan nemese jábirlenýshiniń ózi bolýy múmkin emes, — delingen qalalyq sot taratqan aqparatta.

Onyń qanynan alkogol men esirtkiniń izderi tabylmady. Sottalýshy óz kinásin ishinara moıyndady. Prokýror ony 10 jylǵa bas bostandyǵynan aıyrýdy surady.

— Sot is materıaldaryn, sarapshylardyń qorytyndylaryn jáne sarapshylardyń aıǵaqtaryn zerdeleı kele, er adamnyń áreketin QR Qylmystyq kodeksiniń 106-babynyń 3-bóligimen saralaǵan. Jeńildetetin nemese aýyrlatatyn mán-jaılar tabylǵan joq. Sot sottalýshyny 8 jylǵa bas bostandyǵynan aıyrdy, — dep atap ótti vedomstvonyń baspasóz qyzmeti.

Sonymen qatar, sot Aqtóbe oblystyq densaýlyq saqtaý basqarmasynyń basshysyna jedel járdem qyzmetiniń jumysynda anyqtalǵan kemshilikterdi joıý jáne aldaǵy ýaqytta mundaı jaǵdaılarǵa jol bermeý sharalaryn qoldanýdy talap etip, jeke qaýly shyǵardy. Úkim zańdy kúshine engen joq.

Budan buryn elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsetini anyqtaldy.