Aqtóbede áıeldi uryp, qashyp ketken kúdikti ustaldy
Aqtóbe polıtsııasy áleýmettik jeli arqyly tarap ketken vıdeodaǵy kúdiktini tapty. Beınematerıaldan kópqabatty úıdiń podezine áıelmen birge ere kirgen er adam birden onyń moıynyna jarmasyp, judyryǵymen urǵanyn kórýge bolady.
«Polıtsııa qyzmetkerleri podezde áıeldi uryp-soqqan kúdiktini ustady. Oqıǵanyń mán jaıyn bylaı boldy: 26 sáýir kúni saǵat 16:30-da belgisiz er adam Aqtóbe qalasynyń 12 shaǵyn aýdanyndaǵy kóp qabatty úılerdiń biriniń kireberisinde áıeldiń artynan júgirip kirip, jerge qulatyp, bir ret uryp, qashyp ketken. №2 Aqtóbe qalalyq polıtsııa basqarmasynyń polıtsııa qyzmetkerleri jedel is-sharalar keshenin ótkizdi. Osy aýdanda ornalasqan beınebaqylaý kameralaryn qarady. Nátıjesinde kúdikti adam anyqtalyp, ustaldy. Ol 33 jastaǵy Hromtaý aýdanynyń turǵyny bolyp shyqty», - dedi Aqtóbe qalalyq polıtsııa basqarmasy bastyǵynyń orynbasary Talǵat Berdenov. Qazir osy derek boıynsha Qylmystyq kodekstiń «Buzaqylyq» babymen is qozǵalyp, sotqa deıingi tergeý júrip jatyr. Polıtsııa qyzmetkerleri kúdiktimen sóılesýge múmkindik jasady.
«Aqtóbe qalasynda inimmen birge páter jaldap turdym. Júk tasýshy bolyp jumys ta istedim. Al dál qazir jumyssyzbyn. Men sol kúni ishimdikti kóp iship, esimdi bilmegenmin. Biraq kinámdy moıyndaımyn. Apaıdy tanymaımyn. Óz úıimniń podezine kirdim dep eseptedim», - dedi kúdikti.
Aıta keteıik, kúdikti buǵan deıin de kóshede ishimdik ishkeni úshin ákimshilik jaýapqa tartylǵan. Polıtsııa departamentiniń habarlaýynsha, zardap shekken áıel dárigerge qaralyp, úıine jiberilgen.
