Aqtóbede áıeldi uryp-soqty dep aıyptalyp jatqan qala ákimi aıyppul tóleýi múmkin
AQTÓBE. KAZINFORM – Búgin prokýror jaryssózde Qandyaǵash qalasynyń ákimi Qazbek Aqqaıyrdy aıypty dep tanyp, 80 AEK kóleminde aıyppul tóleý túrindegi jaza taǵaıyndaýdy surady.
Muǵaljar aýdandyq sotynda Qandyaǵash qalasynyń ákimi Qazbek Aqqaıyrǵa qatysty sot otyrysy ótip, jaryssóz boldy. Jaryssóz kezinde prokýror sottalýshy Q. Aqqaıyrdy aıypty dep tanyp, 80 AEK kóleminde aıyppul salýdy, sonymen birge jábirlenýshiniń azamattyq talap aryzyn tolyq qanaǵattandyrýdy surady. Jábirlenýshi suraýy - moraldyq shyǵyn retinde 500 myń teńge, sot shyǵyny - 300 myń teńge. Sot qylmystyq isti qaraý kezinde azamattyq talapty iske kiristirý týraly sheshim qabyldady.
Jaryssóz kezinde jábirlenýshi óziniń aýrýhanaǵa barǵanyn, polıtsııaǵa uryp-soqqan adam ákimdikte jumys isteıtin laýazymdy tulǵa ekenin aıtqanyn jetkizdi. Sotqa aýdıo jáne vıdeo materıaldar usynyp, ony nazarǵa alýdy surady. Al sottalýshy ózine taǵylǵan aıypty moıyndamady.
- 26-jeltoqsan kúni keldi. Eki aradaǵy qarym-qatynas týraly aıtatyn jer emes, jumys orny dep aıttym. Ol shyqpady, otyrdy. Jeńinen ustadym da shyǵaryp jiberdim... Osy ýaqytqa deıin jınaǵan abyroıymyz bar. Osy tirligimen esh dálelsiz meni aıyptap, elge qarabet qyldy. Bul kisimen arada qatynas bolǵanyna men óte qatty ókinemin. Urmadym, qol ushymdy tıgizbedim. Meni aqtaýdy suraımyn,- dedi sottalýshy Qazbek Aqqaıyr.
Eske salsaq, Qandyaǵash qalasynyń ákimine Qylmystyq kodekstiń 109-1-baby 1-bóligi boıynsha aıyp taǵyldy. Іs Muǵaljar aýdandyq sotynda qaralyp jatyr. Sotta dáriger, sot sarapshysy, memlekettik qyzmetshi, bloger kýálik etti.