Aqtóbede áıeldi uryp-soqqany úshin jazalanǵan ákim jumystan shyǵarylady

AQTÓBE. KAZINFORM – AQTÓBE. KAZINFORM – Muǵaljar aýdanynyń ákimi sot úkiminen soń Qandyaǵash qalasy ákimin jumystan bosatatynyn aıtty.

Aqtóbe oblysy Muǵaljar aýdany Qandyaǵash qalasynyń ákimi Qazbek Aqqaıyr apellıatsııalyq shaǵym túsirip, sot úkimi ishinara ózgerdi. Tek aıyppul mólsheri qysqaryp, jábirlenýshiniń ókilge tólenetin shyǵyny ósti. Aqtóbe oblystyq sot alqasynyń qaýlysynan keıin Muǵaljar aýdandyq ákimdigi Qandyaǵash qalasynyń ákimi Qazbek Aqqaıyrdy jumystan shyǵarý týraly sheshim qabyldady.

— Sot sheshimine sáıkes jumystan bosatamyz, — dep jaýap qaıyrdy Muǵaljar aýdanynyń ákimi Darhan Ermaǵambetov.

Aıta keteıik, bıyl kúzde Muǵaljar aýdandyq sotynda Qandyaǵash qalasynyń ákimi Qazbek Aqqaıyrǵa qatysty is qaraldy. Ákimge Qylmystyq kodekstiń «Uryp-soǵý» baby boıynsha aıyp taǵyldy. Oǵan 80 AEK, ıaǵnı, 314 560 teńge kóleminde aıyppul salyndy. Qandyaǵash qalasynyń ákimi Qazbek Aqqaıyr sot úkimimen kelispeı, apellıatsııalyq shaǵym túsirdi. Sot alqasynyń qaýlysymen aıyppul túrindegi jaza mólsheri 295 360 teńgege deıin tómendetildi. Al jábirlenýshi paıdasyna óndirilgen ókilge tólengen shyǵynnyń mólsheri 300 000 teńgege deıin ulǵaıtyldy. 

Qazbek Aqqaıyr 2024 jyly jazda Qandyaǵash qalasynyń ákimi bolyp saılandy. Ol 2018-2022 jyldary aralyǵynda Taldysaı aýyldyq okrýginiń ákimi, 2022-2023 jyldary aralyǵynda Muǵaljar aýdandyq sáýlet, qurylys jáne qala qurylysy bóliminiń basshysy boldy. Keıin Aqtóbe oblysy ákimi apparatynda bas ınspektor qyzmetin atqardy.