Aqtóbede áıeldi kepilge alǵan kúdiktiniń isi sotqa jiberildi
AQTÓBE. KAZINFORM — Aqtóbede áıeldi kepilge alyp, onyń anasy men ógeı ákesin óltirgen kúdiktige qatysty tergeý aıaqtaldy. Prokýratýra isti sotqa jiberdi.
Aqtóbe oblystyq prokýratýrasy baspasóz qyzmetiniń habarlaýynsha, is Qylmystyq kodekstiń úsh baby boıynsha qozǵalyp, tergeý júrdi.
— Tergeý barysynda kúdikti óz tanysymen janjaldasyp, keıin úıine zańsyz kirip, onyń anasyn jáne ógeı ákesin óltirgeni, al jábirlenýshini bostandyǵynan zańsyz aıyryp ustaǵany anyqtaldy. «Arlan» arnaıy bólimshesiniń jedel áreketteriniń nátıjesinde jábirlenýshi bosatylyp, kúdikti oqıǵa ornynda ustaldy. Oblys prokýratýrasymen is erekshe baqylaýǵa alynyp, protsestik prokýrorlar toby taǵaıyndaldy. Kúdiktige Qylmystyq kodekstiń 99-babynyń 2-bóliginiń 1,3,5 tarmaqtary (Eki nemese odan kóp adamdy óltirý), 126-babynyń 2-bóliginiń 3,4 tarmaqtary (Ómiri men densaýlyǵyna qaýipti kúsh qoldaný arqyly zańsyz bostandyǵynan aıyrý) jáne 107-babynyń 1-bóligi (Densaýlyqqa qasaqana ortasha aýyrlyqtaǵy zııan keltirý), ıaǵnı eki nemese odan kóp adamdy asa qatygezdikpen óltirý, sondaı-aq kúsh qoldaný arqyly bostandyǵynan zańsyz aıyrý baptary boıynsha aıyp taǵyldy. Sotta memlekettik aıyptaýdy protsestik prokýror qoldaıtyn bolady, — dedi Aqtóbe oblysy prokýratýrasynyń prokýrory Ásel Málikova.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady.