Aqtóbede áıeldi kepilge alǵan kúdiktiniń isi boıynsha aldyn ala tyńdaý ótetin kún belgili boldy

AQTÓBE. KAZINFORM – Sot aldyn ala tyńdaý kúnin 26 mamyrǵa belgiledi.

Aqtóbe oblystyq qylmystyq ister jónindegi mamandandyrylǵan aýdanaralyq sotyna túsken is qazaq tilinde ótedi.

- Іs qylmystyq ister jónindegi mamandandyrylǵan aýdanaralyq sotyna túsip, aldyn ala tyńdaý 26 mamyr saǵat 10:00-ge taǵaıyndaldy. Іstiń tili – qazaq tili. Sýdıa – Jánibek Seıtjaparov, - dep habarlady Aqtóbe oblystyq sotynyń baspasóz qyzmeti.

Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi.

Birden qylmystyq is qozǵalyp, tergeý júrdi.

Kepilde bolǵan áıel birneshe kún aýrýhanada em qabyldady. 

Prokýratýra kúdiktige Qylmystyq kodekstiń 99-babynyń 2-bóliginiń 1,3,5 tarmaqtary (Eki nemese odan kóp adamdy óltirý), 126-babynyń 2-bóliginiń 3,4 tarmaqtary (Ómiri men densaýlyǵyna qaýipti kúsh qoldaný arqyly zańsyz bostandyǵynan aıyrý) jáne 107-babynyń 1-bóligi (Densaýlyqqa qasaqana ortasha aýyrlyqtaǵy zııan keltirý) boıynsha aıyp taǵylǵanyn habarlady.