Aqtóbede áıeldi kepilde ustaǵan kúdiktiniń nashaqor ekeni ras pa
AQTÓBE. KAZINFORM – Aqtóbede áleýmettik jeli qoldanýshylarynyń biri jazba qaldyryp, jýyrda qalada óltirilgen qos qarııanyń biri óziniń ákesi ekenin aıtty. Sondaı-aq ol jazbasynda kisi óltirdi dep kúdik keltirilip otyrǵan adamnyń esirtki tutynatynyn málimdedi.
Polıtsııa bolsa muny joqqa shyǵaryp, jalǵan aqparat taratpaýǵa shaqyrdy.
Áleýmettik jelide Eleonora atymen jazba qaldyrǵan áıel qaza tapqan 75 jastaǵy er adamdy ákesi dep ataǵan. Ol ákesimen birge birge túsken otbasylyq fotolaryn júktep, tergeýdiń jan-jaqty ári ádil ótkenin qalaıtynyn habarlady.
- Men Aqtóbede mert bolǵan adamnyń qyzymyn. Meıramhanadaǵy sadaqaǵa adamdardy tasymaldaýǵa kómektesken Aqtóbe qalalyq ákimdigine alǵysymdy aıtamyn. Sonymen birge polıtsııaǵa habar saǵat 19:38-de tústi. Al tutqyndardy bosatý saǵat 01:00-de júrgizildi. 5 saǵattyq kelissóz? Anam (ógeı anam) kúndiz kóz jumǵan, al meniń ákem klınıkalyq ólim aýzynda jatqan. Eger sol kezde kómek kórsetkende ákemdi aman alyp qalýǵa bolar edi. Ońbaǵan olardy aıaýsyz óltirdi... Esirtki tutynatyn ol adammen 5 saǵat boıy qalaı kelissóz júrgizýge bolady?»,- dep jazylǵan habarlamada.
Al Aqtóbe oblystyq Polıtsııa departamentiniń baspasóz qyzmeti jalǵan aqparat taratpaýǵa shaqyrdy.
- Kúdikti nashaqor emes, esepke alynbaǵan. Saraptama jasaldy, qanynan esirtki tabylmady. Resmı aqparatqa ǵana senim artýǵa shaqyramyz,- dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
Eske salsaq, 13 qańtar kúni túnde Aqtóbede túnde 75 jáne 67 jastaǵy qos qarııa kóz jumdy. Al tiri qalǵan 40 jastaǵy áıel aýrýhanada bir apta jatyp, em qabyldady. Ony travmatologtarmen birge psıhologtar emdedi.
Osy oqıǵadan soń Qylmystyq kodekstiń «Adam óltirý», «Adamdy kepilge alý» baptary boıynsha is qozǵalyp, tergeý júrip jatyr.
Qazirgi kezde jábirlenýshi áıel aýrýhanadan úıine shyǵaryldy.