Aqtóbede Aıaz ataǵa hat jazǵan balalardyń tilegi oryndaldy
Aqtóbedegi Jekpe-jek saraıynda Aqtóbe oblysy ákimi Ońdasyn Orazalınniń «Biz elimizdiń jarqyn bolashaǵymyz!» atty jańa jyldyq shyrshasy uıymdastyryldy. Oǵan 9-13 jas aralyǵyndaǵy 200 kópbalaly, az qamtylǵan otbasynyń, jetim, ata-ana qamqorlyǵynsyz qalǵan jáne múmkindigi shekteýli balalar qatysty. Merekelik sharada Aıaz ata men Aqshaqar balalarmen birge eski jylmen qoshtasyp, jańa jyldy qarsy aldy. Aıaz ata shyrsha shamyn jaǵyp, mýltfılm keıipkerleri bı bılep, án shyrqady.
«Osy merekege arnaıy eń aqyldy, talantty, talapty balalar dep ózderińdi shaqyrdyq. Sebebi sender jyl boıy ózderińniń jetistikterińmen bizdi qýanttyńdar. Biz ózderińmen maqtanamyz. Óıtkeni sender bizdiń bolashaǵymyzsyńdar. Jer betindegi eń ádemi sát alańsyz tynyshtyqta oınaǵan bala kúlkisi men olardyń shattyq pen qýanyshqa bólengen sáti. Keler jyly armandaryń oryndalsyn, jańa jyldaryń qutty bolsyn»,-dedi aımaq basshysy Ońdasyn Orazalın. Sharaǵa qatysqan balalardyń barlyǵyna velosıped, sporttyq kıimder jıyntyǵy, tátti syılyqtar tabystaldy.
«Balalardyń bári hat jazdy. Jetim balalar analaryn surady. Bul óte qıyn. Bıyl syılyqtardyń bári sporttyq qural-jabdyq boldy. Balalarǵa velosıped, symsyz naýshnık, sporttyq kıim, Abaıdyń qara sózderi kitaby berildi. Árıne, tátti syı da bar. Qazirgi kezde 1,5 mıllıon teńge jumsaldy. Ony kásipker demeýshiler kóteredi», - dedi Aqtóbe oblystyq bilim basqarmasynyń basshysy Lázzat Orazbaeva.
