Aqtóbede Aıaz ata men Aqshaqar «kóshe» aralap júr
AQTÓBE. QazAqpart - Aqtóbede Aıaz ata men Aqshaqarlar baıqaýyna 14 ujym qatysty. Olardyń arasynda mektep muǵalimderi men óndiris oryndarynyń jumysshylary bar, dep habarlaıdy QazAqparat tilshisi.
Aqtóbedegi Tuńǵysh Prezıdent atyndaǵy ortalyq saıabaqta Aıaz ata men Aqshaqarlar baıqaýy ótti. Kúni boıy saýda, oıyn-saýyq keshenderin aralap, balalardyń óleńi men tilegin tyńdaǵan olar bı bılep, án aıtty.
Aqtóbe qalalyq mádenıet biliminiń habarlaýynsha, Aıaz ata men Aqshaqarǵa flesh mob bıleý, quttyqtyqtaý arnap, teatrlandyrylǵan kórinis qoıý mindetteldi.
«Kóshe aralap, halyqty jańa jylmen quttyqtadyq. Bári erekshe qýanyshty. Balalar óleń aıtyp, syı aldy. Ómirimde birinshi ret Aıaz ata kıimin kıip, halyqqa qýanysh syılap júrmin. Kóńil-kúıimiz jaqsy, kezdesken kez kelgen adam sýretke túsip, qýanyp júr»,- dedi Murat Sargýlın.
Al Aqshaqar Madına Injılısovanyń aıtýynsha, olar baıqaýǵa bir apta boıy daıyndalǵan. Ekeýi de №23 orta mektepte jas maman bolyp jumys isteıdi. Biri dene shynyqtyrý pániniń muǵalimi, al Aqshaqar psıholog.
«Biz úshin Aıaz ata men Aqshaqar bolý óte qyzyq. Adamdar jaqsy qarsy alyp, tilekterin jetkizedi»,- dedi Madına Injılısova.
Aıaz ata men Aqshaqarlar baıqaýyna qatysýshylarmen Aqtóbe oblysynyń ákimi Berdibek Saparbaev kezdesip, bárine sáttilik tiledi.
«Aıaz ata men Aqshaqar halyqqa erekshe qýanysh syılap, tilek aıtady. Baıqaýda sáttilik tileımin. Bárińizdi 31 jeltoqsan kúni saıabaqta kútemiz. Úzdikter sol kezde marapattalady»,- dedi Aqtóbe oblysynyń ákimi Berdibek Saparbaev.
