Aqtóbede aıaldamaǵa arnalǵan jer kásipkerlerge jalǵa beriledi

AQTÓBE. QazAqparat – Aqtóbede aıaldamaǵa arnalǵan jer jalǵa beriledi. Kásipker saýda núktesin ashyp, avtobýs kútý alańyn taza ustaýy tıis, dep habarlaıdy QazAqparat tilshisi.

«Atameken» palatasynda Aqtóbe qalalyq jer qatynastary, sáýlet jáne qala qurylysy bóliminiń mamandary kezdesý ótkizdi. Basty suraq – aıaldamalar salý, kútip ustaý, qyzmet kórsetý. Bıyl naýryz aıynan bastap aıaldamalarǵa arnalǵan jerdi jalǵa berý jumysy bastalady. Jeńimpaz aýktsıon kezinde anyqtalady. Qalalyq jer qatynastary, sáýlet jáne qala qurylysy bóliminiń basshysy Álibek Serikbaevtyń aıtýynsha, júzden astam jańartylǵan aıaldama salynady. Eski nysandardyń ornyna jyly, dızaıny biryńǵaı, qala turǵyndary úshin yńǵaıly, avtobýs kútý ornynyń qurylysyn júrgizý josparlanǵan. Ári múmkindigi shekteýli jandarǵa yńǵaıly etip jabdyqtalady, elektrondy tablo ornatylady. Eger osy talaptar túgel oryndalsa, kásipkerge jer 20 jylǵa jalǵa beriledi.

«Kásipkerler dárihana da asha alady. Biraq oǵan suranys bolǵan joq. Dúken nemese qoǵamdyq tamaqtaný orny etip qaıta jabdyqtaýǵa ruqsat beriledi. Eń bastysy biryńǵaı sáýlettik kelbetti saqtap, jalǵa alý shartyn oryndaýy tıis. Jer ýchaskelerin aıaldama pavılondary úshin berý usynysy Kásipkerler palatasynda birneshe ret aıtyldy. Bul jumys eki taraptyń ortaq múddesin talqylap, bir sheshim shyǵarylǵan soń qolǵa alyndy», - dedi «Atameken» ÓKP quqyqtyq bóliminiń bastyǵy Nurlan Mahambetov.