Aqtóbede avtobýsy buzylyp, jolda qalǵan 51 Ózbekstan azamatyna kómek kórsetildi
AQTÓBE. QazAqparat - «Samara - Shymkent» tasjolynda Ózbekstan azamattary mingen avtobýs buzylyp qaldy. Aqtóbedegi tótenshe jaǵdaılar qyzmeti jolaýshylardy qaýipsiz jerge tasymaldady, dep habarlaıdy QazAqparat tilshisi.
«Samara - Shymkent» tasjolynyń 668 shaqyrymynda, ıaǵnı, Sarytoǵaı aýyly mańynda «Setra» markili avtobýs buzylyp qaldy. Júrgizýshiler 10 aqpan kúni saǵat 03:00-de tótenshe jaǵdaılar qyzmetinen kómek suraǵan. Sebebi, avtobýsta kompressor isten shyqqan.
«Avtobýsta barlyǵy 54 adam boldy. Onyń 51-i Ózbekstan, úsheýi Qazaqstan azamaty. Qutqarý jumystaryna TJD «Jedel qutqarý jasaǵy» MM-niń jeke quramynan 3 adam, 1 avtokólik jáne jol-patrýldik polıtsııasynan 2 adam, 1 avtokólik jiberildi. Barlyǵy 52 adam Sarytoǵaı aýylynda ornalasqan «Jolserik» kempıngine ornalastyryldy, al 2 júrgizýshi avtokólikti jóndeý úshin avtobýs ishinde qaldy», - dep habarlady oblystyq TJD baspasóz qyzmeti.
