Aqtóbede avtobýstyń aýdarylýy: Dárigerler balalardyń jaǵdaıyn aıtty
AQTÓBE. QazAqparat – Aqtóbe oblystyq Densaýlyq saqtaý basqarmasy avtobýstyń aýdarylýynan zardap shekken balalar men eresek adamdardyń densaýlyǵy týraly aıtty, dep habarlaıdy QazAqparat tilshisi.
«Naýqastardyń jaǵdaıy turaqty. Qazir 9 bala aýrýhanada em qabyldap jatyr. Eki jastaǵy bala ázirge jansaqtaý bóliminde, búgin jalpy palataǵa aýystyramyz. Ol bas-mı jaraqatyn alǵan, jaǵdaıy turaqty. Balalar kóbine bas-mı, kesilgen jaraqat alǵan. Sonymen qatar úsh adam jedel járdem aýrýhanasynda, taǵy úsheýi temir jol aýrahanasynda em qabyldaýda. Olardyń buǵanasy, omyrtqasy, aıaǵy synǵan. Kókbaýyry jyrtylyp ketken naýqasqa ota jasaldy», - dedi oblystyq Densaýlyq saqtaý basqarmasynyń basshysy Áset Qalıev.
Eske salsaq, 5 qazan kúni Aqtóbe qalasynyń mańynda balalar mingen avtobýs jeńil kólikpen soqtyǵysyp, artynan aýdarylǵan bolatyn. Avtobýstyń ishinde №9 mektep-gımnazııanyń oqýshylary, barlyǵy 18 bala men 9 eresek adam bolǵan. Olar mektep ákimshiligine eskertpesten tabıǵat aıasyna shyqqan.
Jol apaty saldarynan 19 adam aýrýhanaǵa jetkizildi. Ata-analardyń birimen bolǵan eki jasar sábı jansaqtaý bólimine tústi.
