Aqtóbede avtobýs júkti áıeldi qaǵyp ketti
AQTÓBE. QazAqparat - Aqtóbe qalasynda qoǵamdyq kólik aıaǵy aýyr áıeldi qaǵyp ketti. Bul týraly oblystyq ІІD baspasóz qyzmetine silteme jasap QazAqparat tilshisi habarlaıdy.
«Búgin saǵat 13:00-de qoǵamdyq kólik júrgizýshisi jaıaý júrginshini qaǵyp ketti. Oqıǵa qalanyń Ábilqaıyr han dańǵylynda boldy. Áıel jaıaý júrginshiler jolymen ótip bara jatqan. Sol kezde ony avtobýs soqqan. Qazirgi kezde jábirlenýshi oblystyq jedel-járdem aýrýhanasyna jetkizildi. Júrgizýshiniń ishimdik ishken, ishpegeni anyqtalyp jatyr. Tergeý bastaldy»,- dep habarlaıdy oblystyq ІІD-niń baspasóz qyzmetinen.
Dárigerler áıel men ishindegi balasy din aman ekenin aıtýda.
«Ol Jedel medıtsınalyq kómek aýrýhanasynyń qabyldaý bólimine jetkizildi. Tıisti tekserýler júrgizildi. Denesinde soǵylǵan jaraqattar bar. Júktiliginiń merzimi 30-33 apta, bala din-aman. Ony oblystyq aýrýhanaǵa joldadyq», - dedi Aýrýhananyń bas dárigeri Raqymjan Arystan.
