Aqtóbede avıajóndeý zaýytynyń eks-basshysy sottaldy
AQTÓBE. KAZINFORM — Gennadıı Mezentsev 7 jylǵa bas bostandyǵynan aıyryldy. Ol zaýytqa keltirgen materıaldyq shyǵyndy óteýi tıis.
№ 2 Aqtóbe qalalyq sotynda «Avıajóndeý zaýyty № 406 GA» AQ-nyń burynǵy prezıdenti Gennadıı Mezentsevke qatysty is aıaqtaldy. Sot úkimimen sottalýshy 7 jylǵa bas bostandyǵynan aıyryldy.
— Gennadıı Mezentsev Qylmystyq kodekstiń 189-baby 4-bóligi 2-tarmaǵy boıynsha aıypty dep tanylyp, túpkilikti 7 jylǵa bas bostandyǵynan aıyrý jazasy taǵaıyndalsyn. Memlekettik jáne kommertsııalyq uıymdarda materıaldyq jaýapkershilik alatyn laýazymdy atqarý quqyǵynan 6 jylǵa aıyrylsyn. Jazasyn qaýipsizdigi ortasha túzetý mekemesinde ótesin, — dedi sýdıa Nurlan Baqtyǵalıev.
Sot úkimimen «Avıajóndeý zaýyty № 406 GA» AQ-nyń azamattyq talap aryzy ishinara qanaǵattandyryldy. Sottalýshy zaýyttyń 83,5 mln teńge materıaldyq shyǵynyn óteýi tıis.
Sonymen birge sot shyǵyny 2,5 mln teńge dep esepteldi.
Eske salsaq, 2017-2021 jyldary aralyǵynda «Avıajóndeý zaýyty № 406 GA» AQ-nyń prezıdenti qyzmetin atqarǵan G.Mezentsev byltyr «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyptalyp, 4 jyl 6 aıǵa bas bostandyǵynan aıyryldy. Ol kezde 2018-2020 jyldary MI-2 tikushaǵynyń qosalqy bólshekterin, agregattardy negizsiz esepten shyǵarǵany úshin aıyp taǵyldy. Arada bir jyl ótkende ekinshi is sotqa tústi.
