Aqtóbede avıazaýyttyń eks-basshysy sot alynda jaýap berip jatyr
AQTÓBE. KAZINFORM - Gennadıı Mezentsev Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha taǵylǵan aıyppen kelispedi. Sotta sottalýshydan jaýap alý aıaqtaldy.
2017-2021 jyldary aralyǵynda «Avıajóndeý zaýyty № 406 GA» AQ-nyń prezıdenti qyzmetin atqarǵan G.Mezentsev byltyr «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyptalyp, 4 jyl 6 aıǵa bas bostandyǵynan aıyryldy. Ol kezde 2018-2020 jyldary MI-2 tikushaǵynyń qosalqy bólshekterin, agregattardy negizsiz esepten shyǵarǵany úshin aıyp taǵyldy.
Arada bir jyl ótkende ekinshi is sotqa tústi. Bul joly da Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyp taǵyldy.
- Gennadıı Mezentsev jóndeý baǵasyn belgiledi jáne jóndeý kezinde qajet bolmaǵan qosalqy bólshekterge tapsyrys berdi. 2018-2021 jyldar aralyǵynda qosalqy bólshekterdi satyp alyp, negizsiz esepten shyǵaryp otyrǵan. Aýdıtorlyq tekserý kezinde 2018-2021 jyldar qamtyldy. Sol ýaqyt aralyǵynda «Avıaservıs Aktobe» JShS, «Batıı N.R» JK-men 1 679 858 077 teńgeniń kelisimsharty jasaldy. Qorytyndysynda 110 918 829 teńgeniń qosaldy bólshekteri negizsiz esepten shyǵarylǵany anyqtaldy, - dedi memlekettik aıyptaýshy.
Prokýror aıyptaý qorytyndysynda «Batıı N.R» JK-niń basshysy onyń birge turatyn áıeli, al «Avıaservıs Aktobe» JShS-niń basshysy jaqyn tanysy dep atap ótti. Alaıda aıyptalýshy eki kompanııamen zaýyt arasyndaǵy kelisim ózi prezıdent qyzmetine taǵaıyndalǵanǵa deıin jasalǵanyn aıtty. Іs materıalyna súıensek, Gennadıı Mezentsev 2017-2021 jyldar aralyǵynda «Avıajóndeý zaýyty № 406 GA» AQ-nyń prezıdenti boldy. Zaýyt 1939 jyldan beri jumys istep tur. Sotta kýáger bolǵan eks-basshynyń biri Qýandyq Qadirbaevtiń aıtýynsha, zaýyt 2002 jylǵa deıin kommýnaldyq kásiporyn bolyp, keıin jekeniń qolyna ótti. Qazirgi aktsıonerleri: MIC Aero Holding S.a.r.L, «Kapıtal-Invest» kompanııasy, «Avıajóndeý zaýyty №405» AQ men Aısulý Dúısenbaeva. Zaýytta AN-2 ushaǵyna, MI-2 tikushaǵyna, qozǵaltqyshtaryna jóndeý jumystary júrgiziledi.
Sot otyrysy jalǵasyp jatyr. Sottalýshynyń qorǵaýshylary aýdıt qorytyndysyna kúmán kiltirdi. 2024 jyldaǵy qylmystyq iste kórsetilgen derekter 2025 jyldaǵy iste de kórsetilgenin aıtyp, qaıtadan memlekettik sot-ekonomıkalyq saraptama taǵaıyndaýdy surady.
Sot otyrysy kelesi aptada jalǵasady. Buǵan deıin habarlaǵanymyzdaı, QMA Aqtóbe oblysy boıynsha departamenti «Avıajóndeý zaýyty № 406 GA» AQ-nyń burynǵy basshysyna qatysty bıýdjet qarajatyn jymqyrý faktisi boıynsha tergeý júrdi.
2022 jyly zaýyt basshysy tapsyrys az ekenin aıtyp, qarjylyq-ekonomıkalyq qoldaý suraǵan bolatyn.
Keıin jańa basshylyq taǵaıyndalyp, aýdıt tekserýin uıymdastyrǵan.