Aqtóbede aýyryp, rýlge ıe bola almaı qalǵan júrgizýshi kóz jumdy

AQTÓBE. QazAqparat – Aqtóbe oblysy Mártók aýylynda kólik aǵashqa soqtyǵysyp, júrgizýshi aýrýhanada kóz jumdy, dep habarlaıdy QazAqparat tilshisi.

Oqıǵa Aqtóbe oblysy Mártók aýdanynyń ortalyǵynda boldy. «Vaz-111130» markaly avtokóliginiń 62 jastaǵy júrgizýshisi aýyl jolymen júrip kele jatyp, rýldi basqara almaı, aǵashqa soqtyǵysqan.

«Jol-kólik oqıǵasy saldarynan júrgizýshi Mártók aýdanynyń aýrýhanasyna jatqyzylyp, birneshe saǵattan keıin qaıtys boldy. Júrgizýshi kólik júrgizý kezinde aýyryp, rýldi basqara almaı, talǵa soǵylǵan. Qazirgi kezde Qylmystyq kodekstiń «Jol-kólik erejesin buzý» baby boıynsha sotqa deıingi tergeý júrip jatyr», - dedi oblystyq PD baspasóz qyzmetiniń jetekshisi Erbolat Sarqulov.

Aıta keteıik, kólik júrgizýshisi múgedektigi bar adam bolǵan.