Aqtóbede aýylǵa barǵan jas dárigerler 1,5 mln teńgeden aldy

AQTÓBE. QazAqparat - Aqtóbede «Dıplommen aýylǵa» barǵan 45 jas dárigerdiń árqaısysy 1,5 mıllıon teńgeden aldy, dep habarlaıdy QazAqparat tilshisi oblys ákiminiń baspasóz qyzsetine silteme jasap.

Aqtóbe oblystyq medıtsına ortalyǵynda «Jas mamandardyń mamandyqqa bastamasy» atty jas dárigerlerdi qoldaýǵa arnalǵan shara uıymdastyryldy. Merekelik jıynǵa oblys ákimi Ońdasyn Orazalın, oblys ákiminiń orynbasary , oblystyq densaýlyq saqtaý basqarmasynyń basshysy, medıtsınalyq ortalyqtyń bas dárigeri, densaýlyq salasynda qyzmet etken ardagerler qatysty. Aımaq basshysy Ońdasyn Orazalın M.Ospanov atyndaǵy Batys Qazaqstan memlekettik medıtsına ınstıtýtyn bitirip, «Dıplommen aýylǵa» baǵdarlamasy aıasynda aýylǵa jumysqa ornalasqan 45 jas dárigerdiń árqaısysyna 1,5 mıllıon teńgeniń sertıfıkatyn tabystady.

«Prezıdent alǵashqy medıtsınalyq kómek adamdarǵa barynsha jaqyn bolýy kerektigin tapsyrǵan bolatyn. Oblysta medıtsınalyq qyzmettiń sapasyn jaqsartý maqsatynda jumystar júıeli túrde atqarylyp keledi», - dedi oblys ákimi.

Aıta keteıik, óńir basshysy Almaty qalasynda dárigerler arasynda ótken týrnırde úshinshi orynǵa qol jetkizgen fýtbol komandasynyń árbir múshesine 100 myń teńgeniń sertıfıkatyn tabystady.

Statıstıkaǵa súıensek, bıyl oblys ortalyǵynan 45 azamat aýylǵa jumysqa jiberilip otyr. Ótken jyly kórsetkish 32 bolǵan. Aqtóbe oblysynyń densaýlyq salasynda kóptegen jumystar atqarylyp keledi. Máselen, sońǵy 5 jylda oblysymyzda zamanaýı qurylǵylarmen jabdyqtalǵan 36 medıtsınalyq nysan paıdalanýǵa berildi. Búgingi kúnge 5 nysannyń qurylysy jalǵasýda. Temir aýdanynyń Shubarshı aýylynda 50 adamǵa arnalǵan dárigerlik ambýlatorııa qurylysy bastaldy. 2020 jyly zamanaýı talaptarǵa saı keletin oblystyq perınataldy ortalyq paıdalanýǵa beriledi. 2021 jylǵa Shubarqudyq eldimekeninde ortalyq aýdandyq aýrýhanasynyń qurylysy josparlanǵan.