Aqtóbede aýyldyń eks-ákimi maldyń qıynan tyńaıtqysh shyǵara bastady
AQTÓBE. QazAqparat -Aqtóbe oblysy, Alǵa aýdany, Qaraǵash aýyldyq okrýginiń ákimi bolyp, zeınetke shyqqan Aqbópe Ábdýálıeva óz jobasy úshin 3 mıllıon teńge aldy. Ol maldyń qıynan tyńaıtqysh shyǵarady, dep habarlaıdy QazAqparat tilshisi.
Aqtóbe qalasynda áleýmettik kásipkerlik forýmy aıasynda óńir basshysy Berdibek Saparbaev tyń joba avtoryna 3 mıllıon teńgeniń sertıfıkatyn tabys etti. Sáýir aıynda «60/15» óńirlik pılottyq baıqaýy uıymdastyrylyp, ekinshi kezeńge 60 jobanyń 15-i ótti. Búgin jeńimpaz grant ıelendi. Ózge 14 adam «Bıznestiń jol kartasy - 2020» memlekettik baǵdarlamasy aıasynda qoldaýǵa ıe bolady. Al tyń joba usynǵan Aqbópe Ábdýálıeva otbasylyq kásiptiń qyr-syrymen bólisti. Ol 18 jyl boıy Alǵa aýdany, Qaraǵash aýylynda ákim bolyp, keıin Alǵa aýdandyq jumyspen qamtý ortalyǵynda basshylyq qyzmet atqardy.
«Otbasylyq bıznesti kúıeýim Abzal Ábdýálıev basqarady. Ózim zeınetke shyqqan soń «qandaı kásippen aınalysamyn» degen oıǵa keldim. Ákim bolyp, bólim basqarǵan kezde el arasynda kóp júrgen edim. 2000 jyldardyń basynda aýylǵa gaz kirip, maldyń qıy kereksiz bolyp qaldy. Kóshe tazartylmaı, ekologııalyq másele qozǵaldy. Sol kezde qıdy kádege asyratyn joba jasaý oıda boldy. Basshylyq qyzmet mursha bermegen edi. Al endi zeınetke shyǵyp, ıdeıany iske asyrdym»,- dedi kásipker Aqbópe Ábdýálıeva.
Maldyń qıyn kádege asyrýdy oılaǵan Aqbópe Ábdýálıeva Soltústik Qazaqstannyń turǵyny Andreı Streletstiń jobasmen tanysty. Qıǵa qurt salyp, tyńaıtqysh jasaýǵa kóp ýaqyt qajet bolǵan soń balama ádis izdestirildi.
«M tehnologııa» arqyly qıdy organıkalyq tyńaıtqyshqa aınaldyrýǵa bolady. Bar bolǵany 35-40 kún qajet. Arnaıy bakterııa daıyndaıtyn mıkrobıologty Reseıden taýyp, ınternet arqyly tanystym. Sóıtip qysta bıoreaktor satyp aldym. Beınematerıalyn qarap, osy isti bastaǵan kásipkerlermen sóılestim. Nátıjesinde Alǵa qalasyndaǵy jabyq ǵımaratty jalǵa alyp, 300 tonna qı jetkizildi. Qysta jańa tehnologııa boıynsha óńdeý júrdi. Az ýaqytta qıdyń ıisi ketip, topyraq ańqyp turady. Qara topyraqty alyp, konkýrsqa qatystym. Biz úshin nesıe alý qıyn bolǵan soń oblys ákiminiń grantyna úmit arttym»,- dedi kásipker Aqbópe Ábdýálıeva.
Kásipker úshin ónimdi sertıfıkattaý da qıyn bolyp tur. Sebebi, Jambyl oblysynda beriletin sertıfıkat quny 1 mıllııon teńgege jýyq. Jeńimpaz qarjyny qujat rásimdeýge bólip, taýardy resmı jolmen satýdy josparlap otyr.
«Bakterııanyń M kontsentraty arnaıy retsept boıynsha qoldanylady. Komıssııa músheleriniń aldyna baryp, barlyǵyn kórsettim. Bıdaı jaqsy ósedi eken. Ári bólme gúlderine óte paıdaly. Osy arqyly organıkalyq tyńaıtqysh jasaý, ekologııalyq problemany sheshý jolyn usyndym. Qazir Aqtóbede gaz bar, qı kereksiz bolyp qaldy. Gúl sharýashylyǵyn qolǵa alǵan kásipker de tyńaıtqyshty Reseıden alady. Bárine otandyq ónimdi usynǵymyz keledi»,- dedi kásipker.
Qazirgi kezde tyńaıtqyshty untaqtap, aýmaǵy 50 gektar bolatyn sýarmaly jerge paıdalaný josparlandy. Kásipker aldymen ózi tájirıbeden ótkizip, keıin saýda oryndaryna, sharýalarǵa usynady.
«Maldyń qıy tegin. Aldaǵy ýaqytta qustyń sańǵyryǵyn da paıdanalǵymyz keledi. Kásipkerler «sańyryqtan arylsaq, qýanamyz» dep otyr. Bizdi ákimdik qoldaǵanda jobany iske asyryp, damytý bizdiń paryzymyz»,- dedi Aqbópe Ábdýálıeva.
