Aqtóbede aýyldy shańǵa kómgen zaýyttar jumysyn toqtatýy múmkin
AQTÓBE. QazAqparat – Aqtóbeniń Shalqar aýdany Bershúgir aýylyndaǵy qıyrshyq tas zaýyttary shań ustaý, sý sebý qurylǵylaryn paıdalanbaı, aýany lastaǵan, dep habarlaıdy QazAqparat tilshisi.
Aýyl halqy jaz boıy úılerinen shyqpaı, allergııaǵa shaldyqqanyn aıtyp, kómek surady. Aryz-shaǵymnan soń oblystyq ekologııa departamenti tekserý júrgizdi.
«Ekologııa departamenti qıyrshyq tas óndiretin 11 kásiporyndy tekserdi. Nátıjesinde keı kásiporyndardyń ekologııalyq zańnamany saqtamaıtyny, shań men gazdan tazartý qurylǵylaryn paıdalanbaı, qorshaǵan ortaǵa emıssııa úshin ruqsat almaı jumys istegeni anyqtaldy. Barlyǵy 8 kásiporynnan zańsyzdyq anyqtaldy. Olar: «Taý Ken», «Muǵaljar neftestroı», «Irgız Tas Kým», «Temirjol jóndeý», «Altyn Mýnaı Tas», «Akshat Aktobe», «Aktıýbınskaıa kompanııa ınertnyh materıalov», «Nýr Tas Aktobe» JShS. Bári ákimshilik jaýapkershilikke tartylyp, 19 mıllıon teńge aıyppul salyndy. Sonymen qatar qorshaǵan ortaǵa zııan keltirgeni úshin 174 mıllıon teńge tóleıdi», - dedi oblystyq ekologııa departamenti.Aıta keteıik, ekologııa departamenti «Muǵaljar neftestroı», «Altyn Mýnaı Tas», «Nýr Tas Aktobe» JShS-niń jumysyn toqtatý týraly aryzdy sotqa joldady. Eger zaýyttar zańsyzdyqtardy joısa, ári qaraı jumys isteı beredi. Qazirgi ýaqytta ekologtardyń sheshimimen kelispegen kásiporyndar da sotqa qarsy shaǵym túsire alady.
