Aqtóbede aýyldasyn óltirgen mektep oqýshysyna qatysty sot otyrysy bastaldy
AQTÓBE. QazAqparat – Aqtóbede mektep oqýshysyna pyshaq suǵyp, óltirgen aıyptalýshy Asylbek Sabyrǵa qatysty sot otyrysy bastaldy, dep habarlaıdy QazAqparat tilshisi.
2019 jyldyń qańtar aıynda Aqtóbe oblysynyń Shalqar qalasynda bolǵan eki oqýshy arasyndaǵy kelispeýshilik qaıǵyly jaǵdaımen aıaqtalǵan bolatyn. Arada 9 aı ótkende qylmystyq is sotqa tústi. Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda alǵashqy tyńdalym ótti. Aıyptalýshy Asylbek Sabyr arnaıy kúzetpen jetkizildi. Oǵan Qylmystyq kodekstiń «Adam óltirý» baby boıynsha aıyp taǵyldy.
«Shalqar kóliniń muz aıdynynda oqýshylar ózara kezdesetin bolyp aldyn ala kelisken. Balalar top bolyp turǵanda Asylbek Sabyr kelip, «ne boldy, ne jıyn» dep suraǵan. Sol kezde Mırasbek Dáýletııar jeke sóılesýge 5-6 metr jerge uzap ketedi. Jábirlenýshi M.Dáýletııar aıyptalýshy A.Sabyrdan «bizdiń mekteptiń balalaryna nege áńgime aıtasyń» dep suraǵan. A.Sabyr eshteńe aıtpaǵanyn, tynysh júrińder dep qaıtaryp jibergenin jetkizgen. Saǵat 19:00 shamasynda M.Dáýletııar aldynda turǵan A.Sabyrdy bir ret urǵan. Sol kezde ózge bir bala A.Sabyrdyń aıaǵynan shalyp, qulatqan. Tergeý kezinde anyqtalmaǵan balalar aıyptalýshyny teýip, denesin jaralaǵan. «Jabylmańdar» dep aıqaılaǵan, ony ózgeler estigen. Tergeý kezinde A.Sabyrdan sýyq qarý bolyp tabylmaıtyn, týrıstik maqsatta paıdalanýǵa arnalǵan jınalmaly pyshaqty oń qolyna ustap, qarsy kelgen M.Dáýletııardyń júregine suǵyp alǵany belgili boldy. Jábirlenýshi oqıǵa ornynda kóz jumdy», - dedi prokýror Aınur Dosmýrzaeva.
Aıta keteıik, jábirlenýshi Asylbek Sabyr bıyl 11 synyp oqýy tıis bolatyn. Biraq ol 2019 jyldyń qańtarynan beri qamaýda otyr. Sot otyrysy kezinde aıyptalýshysy alqabılerden bas tartty. Sonymen qatar, aıyptalýshysynyń qorǵaýshysy Asylbek Sabyrdyń basyna qarý taqalǵanyn aıtyp, sol qarýdy qylmystyq iske tirkeýdi surady.
Eske salsaq, Qylmystyq kodekstiń «Adam óltirý» 99-babynyń 2-bólimi 14-tarmaǵy boıynsha 15 jyldan 20 jylǵa deıingi merzimge nemese ómir boıyna bas bostandyǵynan aıyrý jazasy qarastyrylǵan.
