Aqtóbede aýyl turǵyny aýrýhanaǵa ottegi jastyǵyn tartý etti
Qobda aýdanynyń turǵyny Nurlybek Kereımaǵambetov indettiń adam ómiri úshin úlken qaýip tóndirgenin, áli de saqtyq sharasyn qatań ustaný qajet ekenin jaqsy túsinedi. Ol jubaıy, qyzy aýyrǵanda medıtsına qyzmetkerlerine túsken aýyrtpalyq pen jaýapkershilikti anyq sezindi. Sóıtip otbasymen aýrýhanaǵa shaǵyn syılyq jasaýdy uıǵardy.
«Álemdi jaılaǵan indet otbasymyzda aınalyp ótpedi. Janyńa jaqyn jandar aýyryp, em qabyldap shyqqanda balama aýrýhanaǵa kómektesý qajet dep aıttym. Shaǵyn kásibi bar bolǵan soń ottegi jastyǵyn satyp aldy. Altaýyn aýdandyq aýrýhanaǵa, bireýin týǵan jerim Álııa aýylyna syıǵa tartý ettik», - dedi aýyl turǵyny Nurlybek Kereımaǵambetov. Zeınetker aýdandyq ardagerler keńesiniń tóraǵasy qyzmetin atqaryp júr. Ári aýdan ákimi janynan qurylǵan monıtorıng toptyń múshesi.
«Vırýstyń qaýipti, adam talǵamaıtynyn kórip, bilip júrmiz. Osy shaqta saqtyq sharasyn ustanǵan adam ǵana aman qalady. Muny túsindirý úshin kásipkerlermen kezdesip, turǵyndarǵa aıtamyz. Toı, sadaqaǵa barýǵa bolmaıdy. Asa qajet bolsa qońyraý shalyp, kóńil bildirip jatyrmyz. Bul durys sheshim», - dedi zeınetker.
Aıta keteıik, Qobda aýdandyq aýrýhanasynda 21 ottegi jastyǵy, 9 ottegi kontsentratory, 5 ottegi ballony bar. Qaıyrymdylyq sharasy munymen shektelmeıdi. Aýdan kásipkerleri aýrýhanaǵa turaqty túrde qymyz jetkizip berip otyr. Sharýalar jas maldyń eti jáne kókónispen qamtamasyz etti.
