Aqtóbede aýyl turǵyndarynan 50 keli balyq tárkilendi
Yrǵyz aýdandyq tabıǵatty qorǵaý polıtsııasynyń qyzmetkerleri Yrǵyz aýylynan 110 shaqyrym jerde ornalasqan Torǵaı kólinde sazan tuqymdas balyqty zańsyz aýlaýmen aınalysqan eki jergilikti turǵyndy ustady. Tergeý barysynda ustalǵan adamdardan balyq aýlaýǵa arnalǵan quraldar, onyń ishinde aý, úrle rezeńke qaıyq, sondaı-aq jalpy salmaǵy 50 keli bolatyn balyq tárkilendi.
Osy derek boıynsha Qylmystyq kodekstiń «Balyq resýrstaryn, basqa sý janýarlaryn nemese ósimdikterin zańsyz óndirý» baby boıynsha is qozǵaldy.
«Oblys aýmaǵynda 20-qazan men 19-qarasha aralyǵynda «Brakoner» jedel aldyn alý sharasy bastaldy. Bul tabıǵatty qorǵaý zańnamasyn buzý derekterin, bıologııalyq resýrstar obektileri men ónimderiniń zańsyz aınalymyn anyqtaý men jolyn kesýge, ekologııalyq qylmystyq quqyq buzýshylyqtardy ashýǵa baǵyttalǵan. Alǵashqy kúni mobıldi toptar tabıǵat qorǵaý zańnamasyn buzǵan 19 derekti anyqtady. Onyń ishinde janýarlar dúnıesin paıdalaný talaptaryn jáne ań aýlaý qaǵıdalaryn buzýdyń 14, balyq aýlaý jáne balyq resýrstary men basqa da sý janýarlaryn qorǵaý qaǵıdalaryn buzýdyń 5 deregi bar», - dedi oblystyq PD baspasóz qyzmetiniń jetekshisi Erbolat Sarqulov.
