Aqtóbede aýyl turǵyndary fakelderde jaǵylatyn ilespe gazdy tutynyp otyr
AQTÓBE. QazAqparat - Aqtóbede aýyl turǵyndary fakelderde jaǵylatyn ilespe gazdy tutynyp otyr. Baıǵanın aýdany Jarqamys aýylyna gaz qubyryn tartyp bergen munaı kompanııasy qarjy únemdep, turǵyndardy ábigerge saldy. Sebebi, qystyń aıazynda gaz qatyp qalyp, aýyl halqy jylýsyz otyrady, habarlaıdy QazAqparat tilshisi.
Aqtóbe oblysy Baıǵanın aýdanyna qarasty Jarqamys aýylynyń turǵyndary 5 jyldan beri gaz paıdalanyp otyr. Bul munaımen ilesip shyǵatyn gaz, ıaǵnı, óndelmegen. «Qazaqtúrikmunaı» kompanııasy áleýmettik jaýapkershilik aıasynda aýylǵa gaz qubyryn tartyp, turǵyndarǵa tegin tutyný quqyǵyn berdi. Qazirgi kúni elimiz boıynsha gazdy tegin paıdalanyp otyrǵan aýyl halqy qysty kúni azap shegip otyr. Sebebi, qystaǵy aıazda gaz qatyp qalady.
«Gaz qubyryn tartý kezinde munaı kompanııasy arnaıy qurylǵyny qondyrmaǵan. Bul qatelikti joıý úshin jumys istep jatyrmyz. Eskertý berildi, bári qalypqa keledi. Qystaǵy aıazda gaz qatyp qalyp, aýyl turǵyndary jylýsyz otyrǵan kúnder boldy. Biraq bıyl mundaı derek tirkelmedi»,- dedi Baıǵanın aýdanynyń ákimi Mamyrǵalı Aqqaǵazov.
Aıta keteıik, aýdan ortalyǵy Qaraýylkeldi men Jarqamys aýylynan ózge eldi meken turǵyndarynyń bári qysta qatty otyn paıdalanady. Aýdanǵa kómir jetkizetin eki kásipker tonnalap emes, qapqa salyp, paıda tabýdy kózdegen. Ákimdik olarǵa tosqaýyl qoıa almaı otyr.
«Aýylda kómirdiń bir qaby 1200 teńge. Kúnine 2 pesh úshin 1 qap kómir kerek. Biz 40-50 myń teńgeni tek kómirge jumsap, shyǵynǵa batyp otyrmyz. Bizge gaz kerek. Biraq Jarqamys aýylyndaǵy ilespe gazdy tutynýǵa qarsymyz. Olarda gaz bir kún bar, ekinshi kúni joq. Qystaı qıyndyq kórip shyǵady»,- deıdi Kemershı aýylynyń turǵyny Gúlshat Ábishova.
