Aqtóbede aýyl sharýashylyǵy tehnıkalarynyń 89 paıyzy tozǵan
AQTÓBE. QazAqparat - Aqtóbede kombaındar men traktorlardyń 89 paıyzy tozǵan. Sharýalar ótken jyly bar bolǵany 115 tehnıka satyp aldy, dep habarlaıdy QazAqparat tilshisi.
Aqtóbe oblysy boıynsha ótken jyly barlyǵy 200 mıllıard teńgeniń aýyl sharýashylyǵy ónimi óndirildi. Ósimdik sharýashylyǵynda mıneraldy tyńaıtqyshtardy qoldaný 2,5 ese artyp, aramshópke qarsy hımııalyq óńdeý jumysy 42 paıyzǵa artty. 2017 jyly egin de bitik shyǵyp, sharýalar ár gektarynan 13,4 tsentner astyq jınady. Barlyǵy 512 myń tonna astyq aldy. Biraq aýyl sharýashylyǵy salasynda qıyndyqtar men kedergiler áli bar.
«Kóktemgi egiske 43 myń tonna dándi daqyl tuqymy kerek bolsa, onyń bári tolyq qamtamasyz etildi. Tuqymdar synamadan ótip, daıyndaldy. Óńirge 65 tonna maıly daqyl tuqymy jetpeı tur. Tuqym Shyǵys Qazaqstan men shetelden jetkiziledi dep kútilýde. Kartoptyń 267 tonna tuqymy jetpeıdi. Qajetti tuqymdy jergilikti aýyl sharýashyly ónimin óndirýshiler men reseılik sharýalardan alamyz. Bir aıta ketetin jaıt, Aqtóbede aýyl sharýashylyǵy tehnıkalarynyń 80 paıyzy TMD elderinen shyǵarylǵan. Astyq jınaıtyn kombaındar men traktorlar 18-20 jyldan beri qoldanylyp keledi. Al olardyń jaramdyǵyly bar bolǵany 8-10 jyl bolyp tur. Qolda bar traktordyń 89 paıyzy tozdy. Ótken jyly 903 traktor men 50 kombaın esepten shyǵarylyp, sharýalar 115 tehnıka satyp aldy»,- dedi Aqtóbe oblysy ákiminiń orynbasary Mavr Abdýllın.
